ಅಮ್ನೆಸ್ಟಿ ಇಂಟರ್‌ನ್ಯಾಷನಲ್ ಕಾನೂನುಬಾಹಿರ ‘ಅನಪೇಕ್ಷಿತ ಸಂಸ್ಥೆ’: ರಷ್ಯಾ

ಮಾಸ್ಕೊ, ರಷ್ಯಾ: ‘ಅಮ್ನೆಸ್ಟಿ ಇಂಟರ್‌ನ್ಯಾಷನಲ್ ಕಾನೂನುಬಾಹಿರ ‘ಅನಪೇಕ್ಷಿತ ಸಂಸ್ಥೆ’ಯಾಗಿದೆ. 2015ರ ಕಾನೂನಿನ ಅಡಿಯಲ್ಲಿ ಇಂತಹ ಸಂಸ್ಥೆಯ ಚಟುವಟಿಕೆಯಲ್ಲಿ ಭಾಗಿಯಾಗುವುದು ಕ್ರಿಮಿನಲ್‌ ಅಪರಾಧವಾಗಿದೆ’ ಎಂದು ರಷ್ಯಾದ ಅಧಿಕಾರಿಗಳು ತಿಳಿಸಿದ್ದಾರೆ. 

ಈ ಕುರಿತು ರಷ್ಯಾದ ಪ್ರಾಸಿಕ್ಯೂಟರ್ ಜನರಲ್‌ ಕಚೇರಿಯು ಆನ್‌ಲೈನ್ ಹೇಳಿಕೆಯನ್ನು ಬಿಡು‌ಗಡೆಗೊಳಿಸಿದೆ.

2022ರ ಫೆಬ್ರುವರಿಯಲ್ಲಿ ಉಕ್ರೇನ್‌ ಮೇಲೆ ರಷ್ಯಾವು ದಾಳಿ ಆರಂಭಿಸಿದ ಬಳಿಕ ಸರ್ಕಾರದ ವಿರುದ್ಧ ಧ್ವನಿಯೆತ್ತುವ ಪತ್ರಕರ್ತರು, ಹೋರಾಟಗಾರರನ್ನು ಹತ್ತಿಕ್ಕಿತ್ತು. ಇದೀಗ, ಸಂಘಟನೆಯ ಮೇಲೂ ಕ್ರಮ ಕೈಗೊಂಡಿದೆ.

‘ಅಂತರರಾಷ್ಟ್ರೀಯ ಮಾನವ ಹಕ್ಕು ಸಂಘಟನೆಯು ರಷ್ಯಾದಲ್ಲಿ ಯಾವುದೇ ರೀತಿಯ ಕೆಲಸ ಮಾಡುವುದನ್ನು ಸ್ಥಗಿತಗೊಳಿಸಬೇಕು. ಅದಕ್ಕೆ ಸಹಕಾರ ಅಥವಾ ಬೆಂಬಲ ನೀಡುವವರ ವಿರುದ್ಧ ಕಾನೂನು ಕ್ರಮ ಕೈಗೊಳ್ಳಲಾಗುವುದು’ ಎಂದು ರಷ್ಯಾ ಸರ್ಕಾರ ಎಚ್ಚರಿಸಿದೆ.