ವಿದ್ಯುತ್ ವ್ಯತ್ಯಯ: ವಹಿವಾಟಿನ ಸಮಯ ಕಡಿತಗೊಳಿಸಿದ ಶ್ರೀಲಂಕಾ ಷೇರುಪೇಟೆ

ಕೊಲೊಂಬೊ: ವಿದ್ಯುತ್ ಕಡಿತದಿಂದಾಗಿ 30 ನಿಮಿಷಗಳ ಕಾಲ ಶ್ರೀಲಂಕಾದ ಷೇರುಪೇಟೆ ವಹಿವಾಟು ಸ್ಥಗಿತಗೊಂಡಿದೆ. ಕಳೆದ 2 ದಿನಗಳಿಂದ ಮೂರನೇ ಬಾರಿ ಈ ರೀತಿಯಾಗಿದೆ ಎಂದು ಕೊಲೊಂಬೊ ಸ್ಟಾಕ್‌ ಎಕ್ಸ್‌ಚೇಂಜ್‌ (ಸಿಎಸ್ಇ) ತಿಳಿಸಿದೆ.

ಬುಧವಾರ ಎರಡು ಸಲ ವಹಿವಾಟು ಸ್ಥಗಿತಗೊಂಡಿತ್ತು.

ವಿದೇಶಿ ವಿನಿಮಯ ಮೀಸಲು ಕೊರತೆಯಿಂದಾಗಿ ತೀವ್ರ ಆರ್ಥಿಕ ಮುಗ್ಗಟ್ಟಿನಿಂದ ತತ್ತರಿಸಿರುವ ಶ್ರೀಲಂಕಾದಲ್ಲಿ, ಇಂಧನ ಸೇರಿದಂತೆ ಅಗತ್ಯ ಸೇವೆಗಳನ್ನು ಆಮದು ಮಾಡಿಕೊಳ್ಳಲು ಸಾಧ್ಯವಾಗುತ್ತಿಲ್ಲ. ಲಂಕಾದಲ್ಲಿ ಕಳೆದೊಂದು ತಿಂಗಳಿನಿಂದ ದಿನಕ್ಕೆ 7 ಗಂಟೆ ವಿದ್ಯುತ್ ಪೂರೈಕೆ ಸ್ಥಗಿತಗೊಳಿಸಲಾಗುತ್ತಿದೆ. ಹಲವು ಪ್ರದೇಶಗಳಲ್ಲಿ 13 ಗಂಟೆ ವರೆಗೂ ವಿದ್ಯುತ್ ಕಡಿತ ಮಾಡಲಾಗುತ್ತಿದೆ.

ಈ ವಾರದ ಉಳಿದ ದಿನಗಳಲ್ಲಿ ನಾಲ್ಕೂವರೆ ಗಂಟೆ ಬದಲು ಎರಡು ಗಂಟೆಗಳ ವರೆಗೆ ವಹಿವಾಟು ನಿರ್ಬಂಧಿಸಲಾಗುವುದು ಎಂದುಸಿಎಸ್ಇ ತಿಳಿಸಿದೆ. ವಿದ್ಯುತ್ ಅಭಾವದ ಹೊರತಾಗಿಯೂ, ಷೇರು ಮಧ್ಯವರ್ತಿಗಳ ಕೋರಿಕೆ ಮೇರೆಗೆ ಈ ನಿರ್ಧಾರ ತೆಗೆದುಕೊಳ್ಳಲಾಗಿದೆ ಎಂದೂ ಹೇಳಿದೆ.

ಇದನ್ನೂ ಓದಿ:ಶ್ರೀಲಂಕಾ: ದಿನಕ್ಕೆ 10 ಗಂಟೆ ವಿದ್ಯುತ್ ಪೂರೈಕೆ ಸ್ಥಗಿತ

ವಹಿವಾಟು ಆರಂಭದ ಬಳಿಕ ಷೇರುಪೇಟೆ ಸೂಚ್ಯಂಕ ಕುಸಿದಿದೆ. ವಹಿವಾಟು ಅವಧಿ ಮೇಲಿನ ನಿರ್ಬಂಧದ ಸುದ್ದಿ ಮತ್ತು ವಿದ್ಯುತ್ ಕಡಿತದ ವಿಚಾರವು ಷೇರುಪೇಟೆಯ ಮೇಲೆ ಋಣಾತ್ಮಕ ಪರಿಣಾಮ ಉಂಟುಮಾಡಿದೆ ಎಂದು 'ಲಂಕಾ ಸೆಕ್ಯುರಿಟೀಸ್‌' ಉದ್ಯಮದ ಷೇರು ಮಧ್ಯವರ್ತಿ ಹಾಗೂ ವಿಶ್ಲೇಷಕಿ ರೋಷಿನಿ ಗಮಗೆ ಹೇಳಿದ್ದಾರೆ.

2.2 ಕೋಟಿ ಜನಸಂಖ್ಯೆ ಹೊಂದಿರುವ ಶ್ರೀಲಂಕಾ ಏಳು ದಶಕಗಳಲ್ಲಿಯೇ ಕಂಡರಿಯದ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿದೆ.1948ರಲ್ಲಿ ಬ್ರಿಟನ್‌ನಿಂದ ಶ್ರೀಲಂಕಾ ಸ್ವಾತಂತ್ರ್ಯ ಪಡೆದಿತ್ತು.ಕೋವಿಡ್‌ ಸಾಂಕ್ರಾಮಿಕವು ಶ್ರೀಲಂಕಾದ ಈ ಆರ್ಥಿಕ ಬಿಕ್ಕಟ್ಟಿಗೆ ಪ್ರಮುಖ ಕಾರಣವಾಗಿದೆ.