Womens WC: ದಕ್ಷಿಣ ಆಫ್ರಿಕಾಕ್ಕೆ ಮಣಿದ ಭಾರತ

ವಿಶಾಖಪಟ್ಟಣಂ: ನದೀನ್‌ ಡಿ ಕ್ಲರ್ಕ್ (ಔಟಾಗದೇ 89; 52ಕ್ಕೆ2) ಮತ್ತು ಕ್ಲೊಯೆ ಟ್ರಯಾನ್ (49; 32ಕ್ಕೆ 3) ಅವರ ಆಲ್‌ರೌಂಡ್‌ ಆಟದ ನೆರವಿನಿಂದ ದಕ್ಷಿಣ ಆಫ್ರಿಕಾ ತಂಡವು ಗುರುವಾರ ಮಹಿಳೆಯರ ಏಕದಿನ ಕ್ರಿಕೆಟ್ ವಿಶ್ವಕಪ್ ಟೂರ್ನಿಯ ರೋಚಕ ಹಣಾಹಣಿಯಲ್ಲಿ ಮೂರು ವಿಕೆಟ್‌ಗಳಿಂದ ಭಾರತ ತಂಡವನ್ನು ಮಣಿಸಿತು. 

ಎಸಿಎ–ವಿಡಿಸಿಎ ಕ್ರಿಕೆಟ್ ಕ್ರೀಡಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಭಾರತ ನೀಡಿದ್ದ 252 ರನ್‌ಗಳ ಗುರಿಯನ್ನು ಬೆನ್ನಟ್ಟಿದ ಹರಿಣ ಪಡೆ ಏಳು ಎಸೆತಗಳು ಬಾಕಿ ಇರುವಂತೆ ಗುರಿ ತಲುಪಿ ಸಂಭ್ರಮಿಸಿತು. ಸತತ ಎರಡು ಪಂದ್ಯ ಗೆದ್ದಿದ್ದ ಆತಿಥೇಯ ತಂಡಕ್ಕೆ ಇದು ಮೊದಲ ಸೋಲಾಗಿದೆ.

ಭಾರತದ ಬೌಲರ್‌ಗಳ ದಾಳಿಗೆ ನಿಯಮಿತವಾಗಿ ವಿಕೆಟ್‌ಗಳು ಉರುಳುತ್ತಿದ್ದರೂ ಆರಂಭಿಕ ಆಟಗಾರ್ತಿ, ನಾಯಕಿ ಲಾರಾ ವೊಲ್ವಾರ್ಟ್ (70;111ಎ, 4x8) ಅವರು ಆಕರ್ಷಕ ಅರ್ಧಶತಕ ಬಾರಿಸಿ ತಂಡಕ್ಕೆ ಆಸರೆಯಾದರು. ನ್ಯೂಜಿಲೆಂಡ್‌ ವಿರುದ್ಧ ಶತಕ ಬಾರಿಸಿದ್ದ ತಾಜ್ಮಿನ್ ಬ್ರಿಟ್ಸ್ ಅವರು ಖಾತೆ ತೆರೆಯುವ ಮುನ್ನ ಪೆವಿಲಿಯನ್ ಸೇರಿಕೊಂಡರು. ನಂತರ ಬಂದ ಸುನೆ ಲೂಸ್ (5), ಮರೈಝನ್‌ ಕಾಪ್ (20), ಅನೆಕ್ ಬಾಷ್ (1) ಮತ್ತು ಸಿನಾಲೊ ಜಾಫ್ತಾ (14) ಅವರೂ ಹೆಚ್ಚು ಹೊತ್ತು ಕ್ರೀಸ್‌ನಲ್ಲಿ ನಿಲ್ಲಲಿಲ್ಲ.

ಒಂದು ಹಂತದಲ್ಲಿ 142 ರನ್‌ಗಳಿಗೆ ಆರು ವಿಕೆಟ್‌ ಕಳೆದುಕೊಂಡು ಸೋಲಿನ ಹಾದಿಯಲ್ಲಿದ್ದ ತಂಡಕ್ಕೆ ಟ್ರಯಾನ್ ಮತ್ತು ನದೀನ್‌ ಅವರು ಮಹತ್ವದ ಚೇತರಿಕೆ ನೀಡಿದರು. ಅವರು ಏಳನೇ ವಿಕೆಟ್‌ ಜೊತೆಯಾಟದಲ್ಲಿ 69 (60ಎ) ರನ್‌ ಸೇರಿಸಿ ಪಂದ್ಯದ ಚಿತ್ರಣವನ್ನೇ ಬದಲಿಸಿದರು.

ಗೆಲುವಿಗೆ 41 ರನ್‌ ಬೇಕಿದ್ದಾಗ ಟ್ರಯಾನ್ ಅವರನ್ನು ಸ್ನೇಹ ರಾಣಾ ಎಲ್‌ಬಿಡಬ್ಲ್ಯು ಬಲೆಗೆ ಕೆಡವಿ, ಭಾರತದ ಪಾಳಯದಲ್ಲಿ ಸಂಭ್ರಮ ಮೂಡಿಸಿದರೂ ಅದು ಹೆಚ್ಚು ಹೊತ್ತು ಇರಲಿಲ್ಲ. ನಂತರದಲ್ಲಿ  ನದೀನ್‌ ಬಿರುಸಿನ ಆಟವಾಡಿ ತಂಡವನ್ನು ಗೆಲುವಿನ ದಡ ಸೇರಿಸಿದರು. ದಕ್ಷಿಣ ಆಫ್ರಿಕಾ 48.5 ಓವರ್‌ಗಳಲ್ಲಿ 7 ವಿಕೆಟ್‌ಗೆ 252 ರನ್‌ ಗಳಿಸಿತು. ಇದರೊಂದಿಗೆ ಮೂರು ಪಂದ್ಯಗಳಲ್ಲಿ ಎರಡನೇ ಜಯದೊಂದಿಗೆ ಪಾಯಿಂಟ್ಸ್‌ ಪಟ್ಟಿಯಲ್ಲಿ ನಾಲ್ಕನೇ ಸ್ಥಾನಕ್ಕೆ ಬಡ್ತಿ ಪಡೆಯಿತು. ಭಾರತ ಮೂರನೇ ಸ್ಥಾನದಲ್ಲಿದೆ.

ರಿಚಾ ಮಿಂಚು: ಇದಕ್ಕೂ ಮೊದಲು ಟಾಸ್ ಗೆದ್ದ ದಕ್ಷಿಣ ಆಫ್ರಿಕಾ ತಂಡವು ಫೀಲ್ಡಿಂಗ್ ಆಯ್ಕೆ ಮಾಡಿಕೊಂಡಿತು. ಎಂಟನೇ ಕ್ರಮಾಂಕದ ಬ್ಯಾಟರ್ ರಿಚಾ ಘೋಷ್ (94;77ಎ, 4x11, 6x4) ಅವರ ದಿಟ್ಟ ಆಟದಿಂದಾಗಿ ಭಾರತ ತಂಡವು 49.5 ಓವರ್‌ಗಳಲ್ಲಿ 251 ರನ್ ಗಳಿಸಿತು. 

ಅಗ್ರ ಕ್ರಮಾಂಕದ ಬ್ಯಾಟರ್‌ಗಳು ತಮ್ಮ ಸಾಮರ್ಥ್ಯಕ್ಕೆ ತಕ್ಕ ಆಟವಾಡುವಲ್ಲಿ ವಿಫಲರಾದರು. ಕಳೆದೆರಡೂ ಪಂದ್ಯಗಳಲ್ಲಿ ಮಿಂಚಿ ತಂಡಕ್ಕೆ ಆಸರೆಯಾಗಿದ್ದ ದೀಪ್ತಿ ಶರ್ಮಾ (4; 14ಎ) ಅವರನ್ನು ಕಟ್ಟಿಹಾಕುವಲ್ಲಿಯೂ ದಕ್ಷಿಣ ಆಫ್ರಿಕಾ ಬೌಲರ್‌ಗಳು ಸಫಲರಾದರು. ಆದರೆ ರಿಚಾ ಮಾತ್ರ ತಮ್ಮ ಮೇಲಿನ ವಿಶ್ವಾಸವನ್ನು ಉಳಿಸಿಕೊಂಡರು. ಅವರಿಗೆ ಸ್ನೇಹ ರಾಣಾ (33; 24ಎ, 4X6) ಕೂಡ ಉತ್ತಮ ಜೊತೆ ನೀಡಿದರು. 

ಇದರಿಂದಾಗಿ 102 ರನ್‌ಗಳಿಗೆ 6 ವಿಕೆಟ್‌ ಕಳೆದುಕೊಂಡಿದ್ದ ಭಾರತ ತಂಡವು ಹೋರಾಟದ ಮೊತ್ತ ಗಳಿಸಲು ಸಾಧ್ಯವಾಯಿತು. ರಿಚಾ ಮತ್ತು ರಾಣಾ ಎಂಟನೇ ವಿಕೆಟ್ ಜೊತೆಯಾಟದಲ್ಲಿ 88 ರನ್‌ ಸೇರಿಸಿದರು. ಈ ಹಾದಿಯಲ್ಲಿ ರಿಚಾ ಅವರು ಕೇವಲ ಆರು ರನ್‌ಗಳ ಅಂತರದಿಂದ ಶತಕ ತಪ್ಪಿಸಿಕೊಂಡರು. ಆದರೆ ಏಕದಿನ ಕ್ರಿಕೆಟ್‌ನಲ್ಲಿ ಒಂದು ಸಾವಿರ ರನ್‌ ಗಳಿಸಿದವರ ಕ್ಲಬ್‌ಗೆ ಸೇರ್ಪಡೆಯಾದರು. 

ರಿಚಾ ತಮ್ಮ ಏಳನೇ ಅರ್ಧಶತಕ ದಾಟಿದ ನಂತರ ರನ್‌ ವೇಗ ಹೆಚ್ಚಿಸಿದರು. ಒಂದು ಹಂತದಲ್ಲಿ 200 ರನ್‌ ಮೊತ್ತ ಗಳಿಸುವುದೇ ಕಷ್ಟಕರ ಎಂಬಂತಿದ್ದ ಪರಿಸ್ಥಿತಿಯನ್ನು ರಿಚಾ ಬದಲಾಯಿಸಿದರು.  

ಸಂಕ್ಷಿಪ್ತ ಸ್ಕೋರು:

ಭಾರತ: 49.5 ಓವರ್‌ಗಳಲ್ಲಿ 251 (ಪ್ರತಿಕಾ ರಾವಲ್ 37, ಸ್ಮೃತಿ ಮಂದಾನ 23, ಅಮನ್ಜೋತ್ ಕೌರ್ 13, ರಿಚಾ ಘೋಷ್ 94, ಸ್ನೇಹ ರಾಣಾ 33, ಮರೈಝನ್‌ ಕಾಪ್ 45ಕ್ಕೆ2, ನದೀನ್‌ ಡಿ ಕ್ಲರ್ಕ್ 52ಕ್ಕೆ2, ನಾನಕುಲುಲೆಕೊ ಮ್ಲಾಬಾ 46ಕ್ಕೆ2, ಚ್ಲೊಯಿ ಟ್ರಯನ್ 32ಕ್ಕೆ3).

ದಕ್ಷಿಣ ಆಫ್ರಿಕಾ: 48.5 ಓವರ್‌ಗಳಲ್ಲಿ 7 ವಿಕೆಟ್‌ಗೆ 252 (ಲಾರಾ ವೊಲ್ವಾರ್ಟ್ 70, ಕ್ಲೊಯೆ ಟ್ರಯಾನ್ 49, ನದೀನ್‌ ಡಿ ಕ್ಲರ್ಕ್ ಔಟಾಗದೇ 84; ಕ್ರಾಂತಿ ಗೌಡ್‌ 59ಕ್ಕೆ 2, ಸ್ನೇಹ ರಾಣಾ 47ಕ್ಕೆ 2). ಫಲಿತಾಂಶ: ದಕ್ಷಿಣ ಆಫ್ರಿಕಾ ತಂಡಕ್ಕೆ 3 ವಿಕೆಟ್‌ಗಳ ಗೆಲುವು.

ಪಂದ್ಯದ ಆಟಗಾರ್ತಿ: ನದೀನ್‌ ಡಿ ಕ್ಲರ್ಕ್