ಕೆರಿಬಿಯನ್ನರಿಗೆ ಆಘಾತ ನೀಡಿದ ಮಾಲಿಂಗ; ಗೆಲುವಿನ ಸನಿಹದಲಿ ಲಂಕಾ
ವಿಶ್ವಕಪ್‌ ಕ್ರಿಕೆಟ್‌
ಚೆಸ್ಟರ್‌ ಲಿ ಸ್ಟ್ರೀಟ್: ಶ್ರೀಲಂಕಾ ನೀಡಿದ ಸವಾಲಿನ ಮೊತ್ತದ ಗುರಿಯ ಬೆನ್ನೇರಿದ ವೆಸ್ಟ್ ಇಂಡೀಸ್‌ ತಂಡಕ್ಕೆ ಲಸಿತ್‌ ಮಾಲಿಂಗ ಆರಂಭಿಕ ಆಘಾತ ನೀಡಿದರು. ಎರಡು ವಿಕೆಟ್‌ ಕಬಳಿಸುವ ಮೂಲಕ ಕೆರಿಬಿಯನ್‌ ಪಡೆಯನ್ನು ಸಂಕಷ್ಟಕ್ಕೆ ದೂಡಿದರು.
ವೆಸ್ಟ್ ಇಂಡೀಸ್‌ 32ಓವರ್‌ಗಳಲ್ಲಿ 5 ವಿಕೆಟ್‌ ನಷ್ಟಕ್ಕೆ 172ರನ್‌ ಗಳಿಸಿದೆ. ನಿಕೋಲಸ್ ಪೂರನ್(4+) ಮತ್ತು ಕಾರ್ಲೋಸ್ ಬ್ರಾಥ್‌ವೇಟ್(6) ಕಣದಲ್ಲಿದ್ದಾರೆ.
ಕ್ಷಣಕ್ಷಣದ ಸ್ಕೋರ್‌:https://bit.ly/322DFqR
ಆರಂಭದಲ್ಲಿಯೇ ಲಸಿತ್‌ ಮಾಲಿಂಗ ಎರಡು ಪ್ರಮುಖ ವಿಕೆಟ್‌ ಪಡೆಯುವಲ್ಲಿ ಸಫಲರಾದರು. ತಂಡ 22 ರನ್‌ ಗಳಿಸುವಷ್ಟರಲ್ಲಿ ಎರಡು ವಿಕೆಟ್‌ ಉರುಳಿತ್ತು. ಸುನಿಲ್‌ ಆ್ಯಂಬ್ರಿಸ್‌(5) ಮತ್ತು ಶಾಯ್‌ ಹೋಪ್‌(5) ಲಯ ಕಂಡುಕೊಳ್ಳುವ ಮುನ್ನವೇ ಹೊರನಡೆದರು.
ತಾಳ್ಮೆಯ ಆಟ ಪ್ರದರ್ಶಿಸುತ್ತಿದ್ದ ದೈತ್ಯ ಬ್ಯಾಟ್ಸ್‌ಮನ್‌ ಕ್ರಿಸ್‌ ಗೇಲ್ ಮೇಲೆ ಒತ್ತಡ ಹೆಚ್ಚಿತು. ಎರಡು ಸಿಕ್ಸರ್ ಸಿಡಿಸುವ ಮೂಲಕ ಗೇಲ್ ನಿರೀಕ್ಷೆ ಮೂಡಿಸಿದರಾದರೂ ಹೆಚ್ಚು ಸಮಯ ಕ್ರೀಸ್‌ನಲ್ಲಿ ಉಳಿಯಲಿಲ್ಲ. 35 ರನ್‌ ಗಳಿಸಿದ್ದ ಗೇಲ್, ಕಸುನ್‌ ರಜಿತ ಎಸೆತದಲ್ಲಿ ಕ್ಯಾಚ್‌ ನೀಡಿದರು.
ಶಿಮ್ರೊನ್ ಹೆಟ್ಮೆಯರ್(29) ತಂಡಕ್ಕೆ ಆಸರೆಯಾಗುವಂತೆ ಕಂಡರೂ ರನ್‌ಔಟ್‌ನಿಂದಾಗಿ ವಿಂಡೀಸ್‌ ಅಭಿಮಾನಿಗಳ ನಿರೀಕ್ಷೆ ಹುಸಿಯಾಯಿತು. ಬಿರುಸಿನ ಆಟವಾಡಿದ ಜೇಸನ್‌ ಹೋಲ್ಡರ್‌(26) ಜೆಫ್ರಿ ವಾಂಡರ್ಸೆ ಓವರ್‌ನಲ್ಲಿ ವಿಕೆಟ್‌ ಒಪ್ಪಿಸಿದರು.
ಟಾಸ್‌ ಗೆದ್ದ ಕೆರಿಬಿಯನ್‌ ಪಡೆ ಫೀಲ್ಡಿಂಗ್‌ ಆಯ್ಕೆ ಮಾಡಿಕೊಂಡಿತು.ಪೆರೆರಾ–ಕರುಣಾರತ್ನೆ ಜತೆಯಾಟದಿಂದ ಲಂಕನ್ನರು ಉತ್ತಮ ಆರಂಭ ಪಡೆದರು.ಶ್ರೀಲಂಕಾ ನಿಗದಿತ 50ಓವರ್‌ಗಳಲ್ಲಿ 6 ವಿಕೆಟ್‌ ನಷ್ಟಕ್ಕೆ 338ರನ್‌ ಗಳಿಸಿತು. ಭರ್ಜರಿ ಆಟ ಪ್ರದರ್ಶಿಸಿದ ಅವಿಷ್ಕಾ ಫರ್ನಾಂಡಿಸ್‌ 100 ಎಸೆತಗಳಲ್ಲಿ 100 ರನ್‌ ದಾಖಲಿಸಿದರು. ಇದು ಅವರ ಚೊಚ್ಚಲ ಅಂತರರಾಷ್ಟ್ರೀಯ ಶತಕವಾಗಿದೆ.
ಬಿರುಸಿನ ಆಟ ಪ್ರದರ್ಶಿಸಿದ ಕುಶಾಲ ಪೆರೆರಾಗೆ, ನಾಯಕದಿಮುತ್ ಕರುಣಾರತ್ನೆ ತಾಳ್ಮೆಯ ಆಟದೊಂದಿಗೆ ಸಾಥ್‌ ನೀಡಿದರು. 93 ರನ್‌ ಜತೆಯಾಟಕ್ಕೆ ಜೇಸನ್‌ ಹೋಲ್ಡರ್‌ ತಡೆಯಾದರು. ಪೆರೆರಾ 38 ಎಸೆತಗಳಲ್ಲಿ ಅರ್ಧ ಶತಕ ಪೂರೈಸಿದರು. ವಿಶ್ವಕಪ್‌ ಟೂರ್ನಿಯಲ್ಲಿ ಇದು ಅವರ ಮೂರನೇ ಅರ್ಧ ಶತಕವಾಗಿದೆ.ಆರನೇ ಕ್ರಮಾಂಕದಲ್ಲಿ ಆಡಿದ ಲಾಹಿರು ತಿರಿಮನ್ನೆ ಚುರುಕಿನಆಟದಿಂದಾಗಿ ತಂಡ ಸವಾಲಿನ ಮೊತ್ತ ದಾಖಲಿಸಿತು. ಲಾಹಿರು 33 ಎಸೆತಗಳಲ್ಲಿ 45 ರನ್‌ ದಾಖಲಿಸಿದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.