ಮೆಸ್ಸಿ ಹಸ್ತಾಕ್ಷರದ ಅರ್ಜೆಂಟೀನಾದ ಜೆರ್ಸಿ ಪಡೆದ ಮಮತಾ ಬ್ಯಾನರ್ಜಿ

ಕೋಲ್ಕತ್ತ: ವಿಶ್ವದ ಶ್ರೇಷ್ಠ ಫುಟ್‌ಬಾಲ್‌ ಆಟಗಾರ ಅರ್ಜೆಂಟೀನಾದ ಲಯೊನೆಲ್‌ ಮೆಸ್ಸಿ ಅವರ ಹಸ್ತಾಕ್ಷರ ಹೊಂದಿರುವ ಜೆರ್ಸಿಯನ್ನು ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ಪಡೆದಿದ್ದಾರೆ.

ಮೆಸ್ಸಿ ಉಡುಗೊರೆಯಾಗಿ ನೀಡಿರುವ ಈ ಸಮವಸ್ತ್ರವು ಬಂಗಾಳ ಮತ್ತು ಕಾಲ್ಚೆಂಡಿನ ಆಟದ ಮೇಲಿನ ಅವಿನಾಭಾವ ಸಂಬಂಧವನ್ನು ಸೂಚಿಸುತ್ತದೆ ಎಂದು ಮಮತಾ ಹೇಳಿದ್ದಾರೆ.

ಈ ಕುರಿತು ಸಾಮಾಜಿಕ ಮಾಧ್ಯಮ 'ಎಕ್ಸ್‌'ನಲ್ಲಿ ಬರೆದುಕೊಂಡಿರುವ ಮಮತಾ, 'ಬಂಗಾಳದಲ್ಲಿ ಪ್ರತಿಯೊಬ್ಬ ಫುಟ್ಬಾಲ್ ಪ್ರೇಮಿಯಂತೆ ನನ್ನ ರಕ್ತದಲ್ಲೂ ಫುಟ್ಬಾಲ್ ಅಡಗಿದೆ. ಇಂದು ಲಯೊನೆಲ್ ಮೆಸ್ಸಿ ಸಹಿ ಮಾಡಿದ ಜೆರ್ಸಿ ಪಡೆದಾಗ ಈ ಉತ್ಸಾಹವು ವಿಶೇಷ ಸ್ಥಾನವನ್ನು ಪಡೆಯಿತು' ಎಂದು ಹೇಳಿದ್ದಾರೆ.

'ಫುಟ್ಬಾಲ್ ಮೇಲಿನ ಪ್ರೀತಿಯು ನಮ್ಮೆಲ್ಲರನ್ನು ಒಗ್ಗೂಡಿಸುತ್ತದೆ. ಮೆಸ್ಸಿ ಕಾಲ್ಚೆಂಡಿನ ಆಟದ ಜಾಣ, ನಮ್ಮ ಯುಗದ ಮಾಂತ್ರಿಕ, ಬಂಗಾಳ ಮೆಚ್ಚುವ ಪ್ರತಿಭೆ ಆಗಿದ್ದಾರೆ. ಈ ಸಮವಸ್ತ್ರವು ಬಂಗಾಳ ಹಾಗೂ ಫುಟ್ಬಾಲ್ ಆಟದ ನಡುವಣ ಅವಿನಾಭಾವ ನಂಟನ್ನು ಸಂಕೇತಿಸುತ್ತದೆ' ಎಂದು ಹೇಳಿದ್ದಾರೆ.