ಖೇಲೊ ಇಂಡಿಯಾ ಪ್ಯಾರಾ ಗೇಮ್ಸ್‌: ಹರಿಯಾಣಕ್ಕೆ ಅಗ್ರಸ್ಥಾನ

ನವದೆಹಲಿ: ಹರಿಯಾಣದ ಕ್ರೀಡಾಪಟುಗಳು, ಗುರುವಾರ ಮುಕ್ತಾಯಗೊಂಡ ಎರಡನೇ ಖೇಲೊ ಇಂಡಿಯಾ ಪ್ಯಾರಾ ಗೇಮ್ಸ್‌ನಲ್ಲಿ ಒಟ್ಟು 34 ಚಿನ್ನದ ಪದಕಗಳನ್ನು ಗೆದ್ದುಕೊಂಡು ಪದಕ ಪಟ್ಟಿಯಲ್ಲಿ ಅಗ್ರಸ್ಥಾನ ಪಡೆದರು. ಈ ತಂಡ 36 ಬೆಳ್ಳಿ, 29 ಕಂಚಿನ ಪದಕಗಳನ್ನೂ ಬಾಚಿಕೊಂಡಿತು.

ತಮಿಳುನಾಡು (28 ಚಿನ್ನ), ಉತ್ತರ ಪ್ರದೇಶ (23 ಚಿನ್ನ) ಕ್ರಮವಾಗಿ ಎರಡು ಮತ್ತು ಮೂರನೇ ಸ್ಥಾನ ಪಡೆದವು.

ಏಳು ದಿನಗಳ ಈ ಕೂಟದಲ್ಲಿ ಮೂರು ತಾಣಗಳಲ್ಲಿ ಪ್ಯಾರಾ ಅಥ್ಲೆಟಿಕ್ಸ್‌, ಪ್ಯಾರಾ ಅರ್ಚರಿ, ಬ್ಯಾಡ್ಮಿಂಟನ್ ಸೇರಿ ಒಟ್ಟು ಆರು ವಿಭಾಗಗಳಲ್ಲಿ ಸ್ಪರ್ಧೆಗಳು ನಡೆದವು. ಒಟ್ಟು 1,300 ಮಂದಿ ಪಾಲ್ಗೊಂಡಿದ್ದರು.

ಒಟ್ಟು 18 ರಾಷ್ಟ್ರೀಯ ದಾಖಲೆಗಳಾದವು. ಅಥ್ಲೆಟಿಕ್ಸ್‌ನಲ್ಲಿ ದಾಖಲೆ ಸ್ಥಾಪಿಸಿದವರಲ್ಲಿ ಕರ್ನಾಟಕದ ಶರತ್‌ ಮಾಕನಹಳ್ಳಿ ಶಂಕರಪ್ಪ ಒಳಗೊಂಡಿದ್ದಾರೆ.