ಹಂಪಿಗೆ ಫಿಡೆ ಗ್ರ್ಯಾನ್‌ಪ್ರಿ ಕಿರೀಟ
ಪುಣೆ: ಭಾರತದ ಕೋನೇರು ಹಂಪಿ ಅವರು ಫಿಡೆ ಮಹಿಳಾ ಗ್ರ್ಯಾನ್‌ಪ್ರಿ ಚೆಸ್‌ (ಪುಣೆ ಲೆಗ್‌) ಟೂರ್ನಿಯಲ್ಲಿ ಪ್ರಶಸ್ತಿ ಗೆದ್ದುಕೊಂಡರು. ಗ್ರ್ಯಾಂಡ್‌ಮಾಸ್ಟರ್‌ಗಳಾದ ಹಂಪಿ ಮತ್ತು ಚೀನಾದ ಝು ಜಿನೆರ್ ಅವರು ತಲಾ ಏಳು ಪಾಯಿಂಟ್ಸ್ ಗಳಿಸಿದರೂ, ಉತ್ತಮ ಟೈಬ್ರೇಕ್‌ ಸ್ಕೋರ್ ಆಧಾರದಲ್ಲಿ ಹಂಪಿ ಚಾಂಪಿಯನ್ ಆದರು.
ಐದು ತಿಂಗಳ ಹಿಂದೆ ವಿಶ್ವ ಮಹಿಳಾ ರ‍್ಯಾಪಿಡ್‌ ಚಾಂಪಿಯನ್ ಪಟ್ಟಕ್ಕೇರಿದ್ದ ಹಂಪಿ ಬುಧವಾರ ನಡೆದ ಒಂಬತ್ತನೇ ಹಾಗೂ ಅಂತಿಮ ಸುತ್ತಿನಲ್ಲಿ ಬಲ್ಗೇರಿಯಾದ ನುರ್ಗ್ಯುಲ್‌ ಸಲಿಮೋವಾ (3.5) ಅವರನ್ನು ಮಣಿಸಿ ಒಟ್ಟು ಏಳು ಪಾಯಿಂಟ್ಸ್ ಕಲೆಹಾಕಿದರು. ಇನ್ನೊಂದು ಪಂದ್ಯದಲ್ಲಿ ರಷ್ಯಾದ ಪೊಲಿನಾ ಶುವಲೋವಾ (4.5) ಅವರನ್ನು ಸೋಲಿಸಿದ ಜಿನೆರ್ ಸಹ ಅಷ್ಟೇ ಪಾಯಿಂಟ್ಸ್ ಸಂಗ್ರಹಿಸಿದ್ದರು.
ಮಂಗಳವಾರ ಎಂಟನೇ ಸುತ್ತಿನ ನಂತರ ಇಬ್ಬರೂ ತಲಾ ಏಳು ಆರು ಪಾಯಿಂಟ್ಸ್ ಗಳಿಸಿದ್ದರಿಂದ ಅಂತಿಮ ಸುತ್ತು ಕುತೂಹಲ ಕೆರಳಿಸಿತ್ತು.
ದಿನದ ಇತರ ಪಂದ್ಯಗಳಲ್ಲಿ ಭಾರತದ ಆರ್‌.ವೈಶಾಲಿ (4) ಅವರು ಜಾರ್ಜಿಯಾದ ಸಲೋಮೆ ಮೆಲಿಯಾ (3) ಜೊತೆ ಡ್ರಾ ಮಾಡಿಕೊಂಡರೆ, ಐಎಂ ದಿವ್ಯಾ ದೇಶಮುಖ್‌ (5.5), ಪೋಲೆಂಡ್‌ನ ಅಗ್ರ ಆಟಗಾರ್ತಿ ಅಲಿನಾ ಕಶ್ಲಿನ್‌ಕಾಯಾ (3) ಜೊತೆ ಪಾಯಿಂಟ್‌ ಹಂಚಿಕೊಂಡರು. ದಿವ್ಯಾ ಮೂರನೇ ಸ್ಥಾನ ಪಡೆದರು.
ದ್ರೋಣವಲ್ಲಿ ಹಾರಿಕಾ (4.5) ಸಹ ಮಂಗೋಲಿಯಾದ ಮುಂಗುನ್ಟುಲ್ ಭಟ್ಖಯಾಗ್ (3) ಜೊತೆ ಡ್ರಾ ಮಾಡಿಕೊಮಡರು. ಹಾರಿಕಾ ನಾಲ್ಕನೇ ಸ್ಥಾನ ಪಡೆದರು.
ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ವಾಟ್ಸ್ಆ್ಯಪ್, ಎಕ್ಸ್, ಫೇಸ್‌ಬುಕ್ ಮತ್ತು ಇನ್‌ಸ್ಟಾಗ್ರಾಂನಲ್ಲಿ ಪ್ರಜಾವಾಣಿ ಫಾಲೋ ಮಾಡಿ.