ಪ್ರೊ ಕಬಡ್ಡಿ | ಮಲಿಕ್ ಮಿಂಚು: ಬೆಂಗಾಲ್ ವಾರಿಯರ್ಸ್ ವಿರುದ್ಧ ಡೆಲ್ಲಿಗೆ ಜಯ

ವಿಶಾಖಪಟ್ಟಣ: ನಾಯಕನಿಗೆ ತಕ್ಕ ಆಟವಾಡಿದ ಆಶು ಮಲಿಕ್ ಅವರ ನೆರವಿನಿಂದ ದಬಂಗ್ ಡೆಲ್ಲಿ ತಂಡವು ಪ್ರೊ ಕಬಡ್ಡಿ ಟೂರ್ನಿಯಲ್ಲಿ ಮಂಗಳವಾರ ನಡೆದ ಪಂದ್ಯದಲ್ಲಿ ಜಯಿಸಿತು. 

ವಿಶ್ವನಾಥ್ ಸ್ಪೋರ್ಟ್ಸ್ ಕ್ಲಬ್  ಒಳಾಂಗಣದಲ್ಲಿ ನಡೆದ ಪಂದ್ಯದಲ್ಲಿ ಡೆಲ್ಲಿ ತಂಡವು 45–34ರಿಂದ ಬೆಂಗಾಲ್ ವಾರಿಯರ್ಸ್ ವಿರುದ್ಧ ಜಯಿಸಿತು.

ಡೆಲ್ಲಿ ತಂಡವು ಆರಂಭದಿಂದಲೇ ಪಾರಮ್ಯ ಮೆರೆಯಿತು. ಪ್ರಥಮಾರ್ಧದಲ್ಲಿ ಡೆಲ್ಲಿ ತಂಡವು 23–14ರಿಂದ ಮುನ್ನಡೆ ಸಾಧಿಸಿತ್ತು. ನಂತರದ ಅವಧಿಯಲ್ಲಿ ಬೆಂಗಾಲ್ ತಂಡವು ಮರುಹೋರಾಟ ತೋರಿತು. ಹಾಗಾಗಿ ಡೆಲ್ಲಿ ತಂಡವು ಈ ಅವಧಿಯಲ್ಲಿ ಕೇವಲ (22–20) ಎರಡು ಪಾಯಿಂಟ್ ಮುನ್ನಡೆ ಪಡೆಯಿತು. 

ಪ್ರಭಾವಶಾಲಿ ಆಟವಾಡಿದ ರೇಡರ್ ಆಶು ಮಲಿಕ್ 16 ಅಂಕಗಳನ್ನು ಗಳಿಸಿದರು.  ಅವರು ಒಟ್ಟು 25 ರೇಡ್‌ಗಳನ್ನು ಸಂಘಟಿಸಿದರು. ಅದರಲ್ಲಿ 11 ಟಚ್ ಪಾಯಿಂಟ್ ಪಡೆಯುವಲ್ಲಿ ಯಶಸ್ವಿಯಾದರು. 5 ಬೋನಸ್ ಅಂಕಗಳನ್ನೂ ತಮ್ಮ ಬುಟ್ಟಿಗೆ ಹಾಕಿಕೊಂಡು ಬಂದರು. 

ಅವರಿಗೆ ಉತ್ತಮ ಜೊತೆ ನೀಡಿದ ಅಜಿಂಕ್ಯ ಪವಾರ್ ಕೂಡ ಎಂಟು ಅಂಕಗಳ ಕಾಣಿಕೆ ನೀಡಿದರು. ಅದರಲ್ಲಿ ಅವರು ಐದು ಟಚ್ ಪಾಯಿಂಟ್ ಮತ್ತು 3 ಟ್ಯಾಕಲ್ ಪಾಯಿಂಟ್ಸ್‌ ಸಂಗ್ರಹಿಸಿದರು. 

ಬೆಂಗಾಲ್ ತಂಡದ ನಾಯಕ ದೇವಾಂಕ್ ಕೂಡ ದಾಳಿಯಲ್ಲಿ 12 ಅಂಕಗಳನ್ನು ಗಳಿಸಿದರು. ಅವರೊಂದಿಗೆ ಎಸ್‌. ವಿಶ್ವಾಸ್ ಕೂಡ (9 ಪಾಯಿಂಟ್) ಮಿಂಚಿದರು.