ಸಾರ್ವಜನಿಕ ಸಾರಿಗೆ ಮೆಟ್ರೊ ಪ್ರಯಾಣ ದರ ಏರಿಸುವ ಅಗತ್ಯವಿತ್ತೇ?: ಜನರ ಆಕ್ರೋಶ

ಸಾರ್ವಜನಿಕ ಸಾರಿಗೆಯಾಗಿರುವ ಮೆಟ್ರೊ ಪ್ರಯಾಣ ದರ ಏರಿಕೆ ಮಾಡುವ ಅಗತ್ಯವಿತ್ತೇ? ಬೆಂಗಳೂರಿಗರ ನಾಡಿಮಿಡಿತವಾಗಿರುವ ಮೆಟ್ರೊದಲ್ಲಿ ಪ್ರತಿನಿತ್ಯ ಲಕ್ಷಾಂತರ ಪ್ರಯಾಣಿಕರು ಸಂಚರಿಸುತ್ತಾರೆ. ದರ ಏರಿಕೆ ಮಾಡಿರುವುದರಿಂದ ವಿದ್ಯಾರ್ಥಿಗಳೂ ಸೇರಿದಂತೆ ಸಾರ್ವಜನಿಕರಿಗೆ ಹೊರೆಯಾಗಿದೆ. ಕೆಲ ಮಾರ್ಗಗಳಲ್ಲಿ ಶೇಕಡ 80ಕ್ಕಿಂತ ಹೆಚ್ಚು ದರ ಏರಿಕೆಯಾಗಿದೆ. ಟೋಕನ್‌ ಮೂಲಕ ಪ್ರಯಾಣಿಸುವವರಿಗೆ ಶೇ 50ರಷ್ಟು ಅಧಿಕವಾದರೆ, ಸ್ಮಾರ್ಟ್‌ ಕಾರ್ಡ್‌ ಮೂಲಕ ಪ್ರಯಾಣಿಸುವವರಿಗೆ ಶೇ 45ರಷ್ಟು ದರ ಹೆಚ್ಚಾಗಿದೆ. ಕೂಡಲೇ ಈ ದರಗಳನ್ನು ಪರಿಷ್ಕರಿಸಬೇಕು. 

ನಮ್ಮ ಮೆಟ್ರೊ ‘ನಿಮ್ಮ’ ಮೆಟ್ರೊ ಎನ್ನುವಂತಾಗಿದೆ. ಇಷ್ಟೊಂದು ದರ ಏರಿಸಲು ಕಾರಣಗಳೇನು ಎಂದು ಸರ್ಕಾರ ಜನಸಾಮಾನ್ಯರಿಗೆ ತಿಳಿಸಬೇಕು. ಮೆಟ್ರೊ ಪ್ರಯಾಣಿಕರೆಲ್ಲರೂ ಇದರ ವಿರುದ್ಧ ಬೃಹತ್ ವಿರೋಧ ದಾಖಲಿಸಬೇಕು. ಒಂದು ಕಡೆ ಗ್ಯಾರಂಟಿ ಯೋಜನೆಗಳನ್ನು ನೀಡುತ್ತೇವೆಂದು ಪ್ರಚಾರ ಗಿಟ್ಟಿಸಿಕೊಳ್ಳುವ ಸರ್ಕಾರಗಳು, ಇನ್ನೊಂದೆಡೆ ಜನಸಾಮಾನ್ಯರನ್ನು ಹಗಲು ದರೋಡೆ ಮಾಡುತ್ತಿವೆ. ಪ್ರತಿದಿನ ಮೆಟ್ರೊ ಅವಲಂಬಿಸಿರುವ ದುಡಿಯುವ ವರ್ಗಕ್ಕೆ ಇದು ಅತಿ ದೊಡ್ಡ ಹೊಡೆತವಾಗಿದೆ.

ಸಾರ್ವಜನಿಕ ಸಾರಿಗೆ ಲಾಭಗಳಿಸುವ ಉದ್ದೇಶದಿಂದ ಸೇವೆ ನೀಡುವುದಲ್ಲ. ವಾಹನಗಳ ಸಂಖ್ಯೆ ಏರಿಕೆಯಿಂದ ಬೆಂಗಳೂರಿನ ಸಂಚಾರ ದಟ್ಟಣೆ ಹೆಚ್ಚಾಗಿದೆ. ಇದೀಗ ಮೆಟ್ರೊ ತುಟ್ಟಿಯಾಗಿದ್ದು, ಈ ಸಮಸ್ಯೆ ಮತ್ತಷ್ಟು ಉಲ್ಬಣಗೊಳ್ಳಲಿದೆ. ರಾಜರಾಜೇಶ್ವರಿ ನಗರದಿಂದ ಮಹಾತ್ಮ ಗಾಂಧಿ ರಸ್ತೆವರೆಗಿನ ಪ್ರಯಾಣ ದರ ಬಹುತೇಕ ದುಪ್ಪಟ್ಟಾಗಿದೆ. ತಿಂಗಳ ಬಜೆಟ್‌ನಲ್ಲಿ ಮೆಟ್ರೊ ಟಿಕೆಟ್‌ಗೆ ಹಣ ಎತ್ತಿಡುವುದು ಈಗ ದೊಡ್ಡ ತಲೆನೋವಾಗಿದೆ. ಈ ಪ್ರಮಾಣದ ದರ ಏರಿಕೆ ನಿಜಕ್ಕೂ ಅಮಾನವೀಯ.

ನಾನು ನಿತ್ಯ ಕಬ್ಬನ್ ಉದ್ಯಾನ ಮೆಟ್ರೊ ನಿಲ್ದಾಣದಿಂದ ಜಯನಗರಕ್ಕೆ ಪ್ರಯಾಣಿಸುತ್ತೇನೆ. ₹ 30 ಇದ್ದ ಪ್ರಯಾಣ ದರ ಈಗ ₹ 50ಕ್ಕೆ ಏರಿಕೆಯಾಗಿದೆ. ಈ ಪ್ರಮಾಣದ ದರ ಹೆಚ್ಚಳ ನಿಜಕ್ಕೂ ಅಚ್ಚರಿಯಾಗಿದೆ. ಇದು ಸಾರ್ವಜನಿಕ ಸಾರಿಗೆ ಬಳಕೆಯನ್ನು ನಿರುತ್ಸಾಹಗೊಳಿಸುತ್ತದೆ. ಇದರಿಂದ ಸಂಚಾರ ಸಮಸ್ಯೆ ಇನ್ನಷ್ಟು ಹೆಚ್ಚಳವಾಗುತ್ತದೆ. ಹಣದುಬ್ಬರದ ಜೊತೆಗೆ ಈ ದರ ಏರಿಕೆಯನ್ನೂ ಸಹಿಸಿಕೊಳ್ಳಬೇಕಾಗಿದೆ. ನಮ್ಮಂತಹ ಮಧ್ಯಮ ವರ್ಗಕ್ಕೆ ಇದು ದೊಡ್ಡ ಬರೆ. ಈಗ ಮೆಟ್ರೊಗಿಂತ ದ್ವಿಚಕ್ರ ಪ್ರಯಾಣವೇ ಉತ್ತಮ.

ಮೆಟ್ರೊ ದರ ಹೆಚ್ಚಳ ಮಾಡುವ ಅಗತ್ಯವಿರಲಿಲ್ಲ. ಮೆಟ್ರೊ ದರವನ್ನು ₹5 ಅಥವಾ ₹10 ಹೆಚ್ಚಿಸದೇ ಶೇಕಡ 50ಕ್ಕಿಂತ ಹೆಚ್ಚು ಪ್ರಮಾಣದಲ್ಲಿ ದರ ಹೆಚ್ಚಳ ಮಾಡಲಾಗಿದೆ. ಕೆಲ ಭಾಗಗಳಲ್ಲಿ ಶೇ 100ರಷ್ಟು ಹೆಚ್ಚಳವಾಗಿದೆ. ಸಮಯ ಉಳಿಸಲು ಮೆಟ್ರೊದಲ್ಲಿ ಪ್ರಯಾಣಿಸುತ್ತಿದ್ದೇವೆ. ಈಗ ದರ ಏರಿಕೆ ಮಾಡಿರುವುದು ನಮಗೆ ಬಹಳ ಬೇಸರ ತಂದಿದೆ. ಈಗ ಮೆಟ್ರೊ ಪ್ರಯಾಣ ಬಿಟ್ಟು ಆಟೊದಲ್ಲಿ ಓಡಾಡುವ ಪರಿಸ್ಥಿತಿ ಎದುರಾಗಿದೆ.

ಮೆಟ್ರೊ ಪ್ರಯಾಣ ದರದಲ್ಲಿ ಶೇಕಡ 10 ರಿಂದ 15ರಷ್ಟು ಹೆಚ್ಚಳ ಮಾಡಿದ್ದರೆ ಯಾವುದೇ ಸಮಸ್ಯೆ ಆಗುತ್ತಿರಲಿಲ್ಲ. ಆದರೆ ನಮ್ಮ ಮೆಟ್ರೊದವರು ಅತಿಹೆಚ್ಚು ಪ್ರಮಾಣದ ಪ್ರಯಾಣ ದರ ಏರಿಕೆ ಮಾಡಿದ್ದರಿಂದ ಮಧ್ಯಮ ವರ್ಗದವರಿಗೆ ಹೊರೆ ಆಗಲಿದೆ. ಸಂಬಳದಲ್ಲಿ ಮೆಟ್ರೊ ಪ್ರಯಾಣಕ್ಕೆ ಎಂದು ಇಂತಿಷ್ಟು ಹಣ ಎತ್ತಿ ಇಡಲಾಗುತ್ತಿತ್ತು. ದಿಢೀರನೆ ಪ್ರಯಾಣ ದರ ಏರಿಕೆ ಮಾಡಿರುವುದು ಸರಿಯಲ್ಲ.

ದಾಸರಹಳ್ಳಿ ಮೆಟ್ರೊ ನಿಲ್ದಾಣದಿಂದ ಮಹಾತ್ಮ ಗಾಂಧಿ ರಸ್ತೆ ಮೆಟ್ರೊ ನಿಲ್ದಾಣಕ್ಕೆ ಈ ಹಿಂದೆ ₹42.72 ಪ್ರಯಾಣ ದರ ಇತ್ತು. ಈಗ ₹ 70 ನೀಡುತ್ತಿದ್ದೇನೆ. ನನಗೆ ಬರುವ  ಸಂಬಳದ ಅರ್ಧ ಭಾಗ ಮೆಟ್ರೊ ಪ್ರಯಾಣಕ್ಕೆ ವ್ಯಯಿಸಬೇಕಾದ ಪರಿಸ್ಥಿತಿ ಎದುರಾಗಿದೆ. ಈ ಹಿಂದೆ ಮೆಟ್ರೊ ಪ್ರಯಾಣಕ್ಕೆ ತಿಂಗಳಿಗೆ ₹3 ಸಾವಿರ ಖರ್ಚಾಗುತ್ತಿತ್ತು. ಈಗ ₹5 ಸಾವಿರಕ್ಕೂ ಹೆಚ್ಚು ಖರ್ಚಾಗಲಿದೆ. ನಾವು ದುಡಿಯುವ ಹಣ ಮೆಟ್ರೊ ಪ್ರಯಾಣಕ್ಕೆ ಖರ್ಚಾಗಿ ಉಳಿತಾಯವೇ ಇಲ್ಲದಂತಾಗಲಿದೆ. ದರ ಏರಿಕೆ ಪ್ರತಿಯೊಬ್ಬರಿಗೂ ಹೊರೆಯಾಗಿ ಪರಿಣಮಿಸಿದೆ.

ಮೆಟ್ರೊ ಶೇಕಡ 50ರಷ್ಟು ದರ ಹೆಚ್ಚಳ ಮಾಡುವ ಮೂಲಕ ಪ್ರಯಾಣಿಕರಿಗೆ ಅನ್ಯಾಯ ಮಾಡಿದೆ. ಕೆಲ ದಿನಗಳ ಹಿಂದೆ ಬಸ್‌ ಪ್ರಯಾಣ ದರ ಏರಿಸಲಾಗಿತ್ತು. ಈಗ ಮೆಟ್ರೊ ಪ್ರಯಾಣ ದರ ಹೆಚ್ಚಿಸಲಾಗಿದೆ. ಮಧ್ಯಮ ವರ್ಗದವರು ಹೆಚ್ಚಾಗಿ ಮೆಟ್ರೊದಲ್ಲಿ ಪ್ರಯಾಣಿಸುತ್ತಿದ್ದು, ಮತ್ತೊಂದು ಆರ್ಥಿಕ ಹೊರೆ ನಿಭಾಯಿಸುವ ಸವಾಲು ಎದುರಾಗಿದೆ. ಬೆಂಗಳೂರಿನಲ್ಲಿ ಜೀವನ ವೆಚ್ಚ ಅಧಿಕವಾಗುತ್ತಿದೆ.