ಬಿಳಿಗಿರಿರಂಗನಬೆಟ್ಟ ಒತ್ತುವರಿ ತೆರವು: ಪ್ರಭಾವಿಗಳ ಬದಲು ಆದಿವಾಸಿಗಳಿಗೆ ಸಂಕಷ್ಟ!

ದಟ್ಟ ಹಸಿರು, ವೈವಿಧ್ಯಮಯ ಸಸ್ಯ–ಪ್ರಾಣಿಗಳ ಆವಾಸಸ್ಥಾನವಾಗಿರುವ ಚಾಮರಾಜನಗರ ಜಿಲ್ಲೆಯ ಬಿಳಿಗಿರಿ ರಂಗನಾಥಸ್ವಾಮಿ ಅರಣ್ಯ ಪ್ರದೇಶವು ವನ್ಯಜೀವಿ ಅಭಯಾರಣ್ಯವನ್ನು ಹೊಂದಿದ್ದು, ಹುಲಿ ಸಂರಕ್ಷಿತ ಪ್ರದೇಶವೂ ಹೌದು.

1900ರ ಅರಣ್ಯ ಕಾಯ್ದೆ ಅನ್ವಯ, ಮೈಸೂರು ಮಹಾರಾಜರೇ ಈ ಬಿಳಿಗಿರಿ ರಂಗನಾಥಸ್ವಾಮಿ ಹುಲಿ ಸಂರಕ್ಷಿತ ಪ್ರದೇಶವನ್ನು, ಅಂದ್ರೆ ಬಿಆರ್‌ಟಿಯನ್ನು, ಮೀಸಲು ಅರಣ್ಯ ಎಂದು ಘೋಷಿಸಿದ್ದರು. ಆದರೆ, ಈಗ ಅದೇ ಹುಲಿಗಳ ನೆಲೆಗೆ ಕುತ್ತು ಬಂದೊದಗಿದೆ. ಕ್ರಮೇಣವಾಗಿ ಈ ಪ್ರದೇಶ ಒತ್ತುವರಿಯಾಗುತ್ತಿದೆ. ಈ ನಿಟ್ಟಿನಲ್ಲಿ, ಒತ್ತುವರಿ ತೆರವಿಗೆ ಅರಣ್ಯ ಇಲಾಖೆ ಮುಂದಾಗಿದೆ. ಈ ನಡುವೆ, ಶತಮಾನಗಳಿಂದ ಬದುಕು ಕಟ್ಟಿಕೊಂಡಿರುವ ಆದಿವಾಸಿಗಳೂ ಆತಂಕದಲ್ಲಿದ್ದಾರೆ.