ನರೇಗಲ್: | ಅನಧಿಕೃತ ನಳಗಳ ಹಾವಳಿ: ಆದಾಯಕ್ಕೂ ಕೊಕ್ಕೆ

ನರೇಗಲ್:‌ ಇಲ್ಲಿನ ಪಟ್ಟಣ ಪಂಚಾಯಿತಿ ವ್ಯಾಪ್ತಿಗೆ ಒಳಪಡುವ 17 ವಾರ್ಡ್‌ಗಳಲ್ಲಿ ಅನಧಿಕೃತ ನಳಗಳ ಹಾವಳಿ ಮಿತಿಮೀರಿದ್ದು, ಸ್ಥಳೀಯ ಆಡಳಿತದ ಆದಾಯಕ್ಕೂ ಕೊಕ್ಕೆ ಬಿದ್ದಿದೆ. ಇಲ್ಲಿನ ಬಹುತೇಕ ಮನೆಗಳ ನೀರು ಪೂರೈಕೆಯ ನಳಗಳು, ದೇವಸ್ಥಾನ, ಮಸೀದಿ, ಸಂಘ ಸಂಸ್ಥೆಯ ನಳಗಳು ಅನಧಿಕೃತವಾಗಿವೆ.  

ಅದೇರೀತಿ, ನರೇಗಲ್‌ ಪಟ್ಟಣ ಮತ್ತು ಮಜರೇ ಹಳ್ಳಿಗಳಾದ ಕೋಚಲಾಪುರ, ಕೋಡಿಕೊಪ್ಪ, ತೋಟಗಂಟಿ, ಮಲ್ಲಾಪುರ, ದ್ಯಾಂಪುರಗಳಲ್ಲಿ ಅಂದಾಜು ಸಾವಿರಕ್ಕೂ ಹೆಚ್ಚು ಅನಧಿಕೃತ ನಳಗಳಿವೆ. 

ಪಟ್ಟಣ ಪಂಚಾಯಿತಿಯಲ್ಲಿ ಈವರೆಗೆ ಅಧಿಕಾರ ನಡೆಸಿದ ಚುನಾಯಿತ ಜನಪ್ರತಿನಿಧಿಗಳು ಹಾಗೂ ಕೆಲಸ ನಿರ್ವಹಿಸಿದ ಅಧಿಕಾರಿಗಳು ಅನಧಿಕೃತ ನಳಗಳನ್ನು ಅಧಿಕೃತ ಮಾಡಿಕೊಂಡು ಆದಾಯ ಹೆಚ್ಚಿಸಿಕೊಳ್ಳುವ ಹಾಗೂ ಅವುಗಳಿಗೆ ಕಡಿವಾಣ ಹಾಕುವ ಗೋಜಿಗೆ ಹೋಗಿಲ್ಲ ಎನ್ನುವುದು ವಿಪರ್ಯಾಸವಾಗಿದೆ.

ಜನರು ಮನೆ ಬಳಕೆಗೆ ಕುಡಿಯಲು ಬಳಕೆ ಮಾಡುವ ಹಾಗೂ ವ್ಯಾಪರಸ್ಥರು ವ್ಯವಹಾರಕ್ಕಾಗಿ ಬಳಕೆ ಮಾಡುವ ವಾಣಿಜ್ಯ ಉದ್ದೇಶದ ನಳಗಳ ಸಂಖ್ಯೆ ಮತ್ತು ಅದರ ಮಾಹಿತಿಯನ್ನು ಪಟ್ಟಣ ಪಂಚಾಯಿತಿಯವರು ಸರಿಯಾಗಿ ನಿರ್ವಹಣೆ ಮಾಡಿಲ್ಲ. ಇದರಿಂದ ಸಂಗ್ರಹವಾಗಿರುವ ಆದಾಯದ ಬಗ್ಗೆಯೂ ಮಾಹಿತಿ ಇಲ್ಲವಾಗಿದೆ. ಜನರಿಗೆ ದುಡ್ಡು ಕಟ್ಟದೆ ನೀರು ಸಿಗುತ್ತಿರುವ ಕಾರಣ ಬೇಕಾಬಿಟ್ಟಿಯಾಗಿ ಬಳಕೆ ಮಾಡುತ್ತಿದ್ದಾರೆ.

ಮೂರನೇ ವಾರ್ಡ್‌ ಆಶ್ರಯ ಕಾಲೊನಿ, ಬುಲ್ಡೋಜರ್‌ ನಗರ, ಏಳನೇ ವಾರ್ಡ್‌ ದ್ಯಾಂಪುರ, ಭಾಗ್ಯನಗರ, ಗ್ರಾಮದ ಹೃದಯ ಭಾಗದ ಕಾಲೊನಿಯ ಬಹುತೇಕ ನಳಗಳಿಗೆ ಇಂದಿಗೂ ಮುಚ್ಚಳವನ್ನು (ಕ್ಯಾಪ್) ಅಳವಡಿಸಿಲ್ಲ. ಇದರಿಂದ ಅನವಶ್ಯಕವಾಗಿ ನೀರು ಪೋಲಾಗಿ, ಚರಂಡಿ ಸೇರುತ್ತಿದೆ. ಇಂತಹ ಅವ್ಯವಸ್ಥೆಗಳು ಕಂಡರೂ ಕಾಣದಂತೆ ಪಟ್ಟಣ ಪಂಚಾಯಿತಿಯವರು ಜಾಣ ಕುರುಡು ಪ್ರದರ್ಶಿಸುತ್ತಿದ್ದಾರೆ. ನೀರು ಹರಿದು ಪೋಲಾಗುವುದಕ್ಕೂ ತಮಗೂ ಸಂಬಂಧವಿಲ್ಲ ಎನ್ನುವಂತೆ ಜನರು ಮುಚ್ಚಳ ಅಳವಡಿಸದೇ ಮೊಂಡುತನ ಪ್ರದರ್ಶಿಸುತ್ತಿದ್ದಾರೆ. ಇದರಿಂದಾಗಿ ಅಮೂಲ್ಯವಾದ ನೀರು ಅಪಾರ ಪ್ರಮಾಣದಲ್ಲಿ ಪೋಲಾಗುತ್ತಿದೆ.

ಸೋರುತಿದೆ ನೀರಿನ ಟ್ಯಾಂಕ್: 2012–13ನೇ ಸಾಲಿನಲ್ಲಿ ಕರ್ನಾಟಕ ನಿರಾವರಿ ನಿಗಮದ ಕೆಡಬ್ಲ್ಯುಎಸ್ ವತಿಯಿಂದ ಅಂದಾಜು ₹50 ಲಕ್ಷ ವೆಚ್ಚದಲ್ಲಿ ದೊಡ್ಡದಾದ ನೀರಿನ ಟ್ಯಾಂಕ್‌ನ್ನು ಪಟ್ಟಣದ ಏಳನೇ ವಾರ್ಡ್‌ ಸರ್ಕಾರಿ ಆಸ್ಪತ್ರೆಯ ಸಮೀಪದಲ್ಲಿ ನಿರ್ಮಿಸಲಾಗಿದೆ. ಆದರೆ ಇಂದಿಗೂ ಉಪಯೋಗವಾಗದೆ ಪಾಳಬಿದ್ದಿದೆ.

ಪಟ್ಟಣ ಪಂಚಾಯಿತಿ ಅಧಿಕಾರಿಗಳು ನೀಡಿದ ಮಾಹಿತಿಯಂತೆ 9 ಕಡೆಗಳಲ್ಲಿ ಬಿರುಕು ಬಿಟ್ಟಿದ್ದು, ನೀರು ಸೋರುತ್ತಿದೆ. ಈಗಾಗಲೇ ಜಿಗಳೂರು ಕೆರೆ ನೀರು ತರುವ ಕಾರ್ಯ ಪೂರ್ಣಗೊಂಡಿದ್ದು ಪೈಪ್‌ಗಳನ್ನು ಅಳವಡಿಸಲಾಗಿದೆ. ಇದೇರೀತಿ ಪಟ್ಟಣದ ಏಳನೇ ವಾರ್ಡ್‌ನಲ್ಲಿ ಸಾಯಿಬಾಬಾ ದೇವಸ್ಥಾನದ ಎದುರು ದೊಡ್ಡದಾದ ಕುಡಿಯುವ ನೀರಿನ ಜಲ ಸಂಗ್ರಹಗಾರ (ನೀರಿನ ಟ್ಯಾಂಕ್) ಇಂದಿಗೂ ಉಪಯೋಗವಾಗದೆ ಪಾಳು ಬಿದ್ದಿದೆ. ಜಿಗಳೂರು ಕೆರೆಯಿಂದ ಸರಬರಾಜಾಗುವ ನೀರನ್ನು ಇಲ್ಲಿನ ಟ್ಯಾಂಕರ್‌ಗಳಲ್ಲಿ ಸಂಗ್ರಹಿಸಿದಾಗ ಕುಸಿದು ಬಿದ್ದು ತೊಂದರೆಗಳು ಸಂಭವಿಸಿದರೆ ಯಾರು ಹೊಣೆ ಎಂದು ಪ್ರಜ್ಞಾವಂತ ಸಾರ್ವಜನಿಕರು ಪ್ರಶ್ನಿಸುತ್ತಾರೆ.

ಒಂದೆಡೆ ನಳಗಳು ಅಧಿಕೃತವಿಲ್ಲ; ಇನ್ನೊಂದೆಡೆ ನೀರು ಸಂಗ್ರಹಿಸುವ ಟ್ಯಾಂಕರ್‌ಗಳು ಬಿರುಕು ಬಿಟ್ಟಿವೆ. ಇವುಗಳ ಸರಿಯಾದ ನಿರ್ವಹಣೆ ಯಾವಾಗ ಎಂದು ಜನರು ಕೇಳುತ್ತಾರೆ.

ಪಟ್ಟಣಕ್ಕೆ ಯಾವುದೇ ನೀರಿನ ಮೂಲಗಳಲ್ಲಿದ ಕಾರಣ ಜನರು ಟ್ಯಾಂಕರ್‌ ಹಾಗೂ ನಳಗಳ ಮೇಲೆ ಅವಲಂಬನೆಯಾಗಿದ್ದಾರೆ. ಬೇಸಿಗೆಯಲ್ಲಿ ಸಮಸ್ಯೆ ಉದ್ಭವಿಸಿದರೆ ಹೇಗೆ ಎಂಬುದರ ಕುರಿತು ಅಧಿಕಾರಿಗಳು ಕುರಿತು ಯೋಚಿಸದೇ ಇರುವುದರಿಂದ ಸಾರ್ವಜನಿಕರ ಹಣ ಪೋಲಾಗುತ್ತಿದೆ ಎಂದು ಪ್ರಜ್ಞಾವಂತರು ಆರೋಪಿಸಿದ್ದಾರೆ.

ಬಳಕೆಯ ನೀರು ಹಾಗೂ ಕುಡಿಯುವ ನೀರಿಗಾಗಿ ಜನ ಅಲ್ಲಿ ಇಲ್ಲಿ ಅಂತ ಸುತ್ತಾಡುತ್ತಿದ್ದಾರೆ. ಅದೇರೀತಿ ಬೇಸಿಗೆಯಲ್ಲಿ ಪಟ್ಟಣ ಪಂಚಾಯಿತಿಯಿಂದಲೂ ಸಹ ನೀರು ಪೂರೈಕೆ ಮಾಡಲು ಹರಸಾಹಸ ಪಡುತ್ತಾರೆ. ಇಷ್ಟೆಲ್ಲಾ ಸಮಸ್ಯೆಗಳು ಕಣ್ಮುಂದೆ ಇದ್ದರೂ ಕಾಮಗಾರಿ ಮುಗಿದು 12 ವರ್ಷಗಳು ಕಳೆದರೂ ಈವರೆಗೆ ನೀರಿನ ಟ್ಯಾಂಕ್ ಬಳಕೆಗೆ ಬಂದಿಲ್ಲ. ಇದರ ಸುತ್ತಲೂ ಜಾಲಿಯ ಗಿಡಗಂಟಿಗಳು ಬೆಳೆದು ನಿಂತಿವೆ ಎಂದು ಆಕ್ರೋಶ ವ್ಯಕ್ತಪಡಿಸಿದ್ದಾರೆ.

ಸಂಬಂಧಪಟ್ಟ ಅಧಿಕಾರಿಗಳು ಪರಿಸ್ಥಿತಿಯನ್ನು ಅರಿತು ಅನಧಿಕೃತ ನಳಗಳಿಗೆ ಕಡಿವಾಣ ಹಾಕಬೇಕು. ಅವುಗಳನ್ನು ಅಧಿಕೃತಗೊಳಿಸಿ  ಮೀಟರ್‌ ಅಳವಡಿಸಿ, ಕರ ಸಂಗ್ರಹಿಸಬೇಕು. ನೀರಿನ ಟ್ಯಾಂಕ್‌ಗಳ ದುರಸ್ತಿ ಕೈಗೊಂಡು ಬಳೆಕೆಗೆ ಮುಂದಾಗಿ ಬೇಸಿಗೆಯಲ್ಲಿ ಉಂಟಾಗುವ ನೀರಿನ ದಾಹವನ್ನು ನೀಗಿಸಬೇಕು ಎಂದು ಸಾರ್ವಜನಿಕರು ಆಗ್ರಹಿಸಿದ್ದಾರೆ.