ಉಡುಪಿ | ಹವಾಮಾನ ವೈಪರೀತ್ಯ: ಅವಧಿಗೆ ಮುನ್ನವೇ ದೋಣಿಗಳು ದಡಕ್ಕೆ

ಉಡುಪಿ: ಸಾಮಾನ್ಯವಾಗಿ ಜೂನ್ 1ರಿಂದ ಟ್ರಾಲಿಂಗ್‌ ನಿಷೇಧ ಜಾರಿಗೆ ಬರುವಾಗ ದಡ ಸೇರುವ ಆಳಸಮುದ್ರ ಮೀನುಗಾರಿಕಾ ದೋಣಿಗಳು ಹವಾಮಾನ ವೈಪರೀತ್ಯದಿಂದಾಗಿ ಈ ವರ್ಷ ಅವಧಿಗೆ ಮುನ್ನವೇ ದಡ ಸೇರಿವೆ.

ಭಾರಿ ಮಳೆ, ಸಮುದ್ರದಲ್ಲಿ ತೂಫಾನ್‌ ಏಳುವ ಸಾಧ್ಯತೆ ಇರುವ ಕುರಿತು ಹವಾಮಾನ ಇಲಾಖೆ ಮುನ್ಸೂಚನೆ ನೀಡಿರುವುದರಿಂದ ಮೀನುಗಾರಿಕಾ ದೋಣಿಗಳು ಮಲ್ಪೆ ಬಂದರಿಗೆ ವಾಪಾಸಾಗಿವೆ.

ಈ ವರ್ಷವಿಡೀ ಮತ್ಸಕ್ಷಾಮದಿಂದಾಗಿ ಮೀನುಗಾರರಿಗೆ ನಷ್ಟ ಉಂಟಾಗಿತ್ತು. ಆದರೆ ಏಪ್ರಿಲ್‌, ಮೇ ತಿಂಗಳಲ್ಲಿ ಬಂಗುಡೆ, ಬೂತಾಯಿ ಸೇರಿದಂತೆ ಹಲವು ಬಗೆಯ ಮೀನುಗಳು ಸಿಗುತ್ತಿದ್ದವು. ಇನ್ನೂ ಸುಮಾರು ಹತ್ತು ದಿನ ಮೀನುಗಾರಿಕೆ ನಡೆಸಲು ಅವಕಾಶವಿತ್ತು ಆದರೆ ಹವಾಮಾನ ವೈಪರೀತ್ಯದಿಂದಾಗಿ ಬೇಗನೆ ದಡ ಸೇರುವಂತಾಯಿತು ಎನ್ನುತ್ತಾರೆ ಮಲ್ಪೆಯ ಮೀನುಗಾರರು.

ಈಗ ದಡ ಸೇರಿರುವ ದೋಣಿಗಳು ಇನ್ನು ಮಳೆ ನಿಂತರೂ ಮೀನುಗಾರಿಕೆಗೆ ತೆರಳುವುದಿಲ್ಲ. ಹೊನ್ನಾವರ ಮೊದಲಾದೆಡೆ ಲಂಗರು ಹಾಕಿರುವ ಮಲ್ಪೆಯ ದೋಣಿಗಳು ಇಲ್ಲಿನ ದಕ್ಕೆಗೆ ವಾಪಸಾಗಲಿವೆ ಎಂದು ಅವರು ಹೇಳಿದ್ದಾರೆ.

ಕಳೆದ ಮಳೆಗಾಲದಲ್ಲಿ ಟ್ರಾಲಿಂಗ್‌ ನಿಷೇಧ ತೆರವಾದ ಬಳಿಕವೂ ಪದೇ ಪದೇ ಚಂಡಮಾರುತ ಎದ್ದಿದ್ದ ಪರಿಣಾಮವಾಗಿ ಮೀನುಗಾರಿಕಾ ದೋಣಿಗಳು ಆಗಾಗ ದಕ್ಕೆಗೆ ಮರಳುತ್ತಿದ್ದವು. ಇದರಿಂದ ಮೀನುಗಾರರಿಗೆ ನಷ್ಟ ಉಂಟಾಗಿತ್ತು. ಕಳೆದ ಮಳೆಗಾಲದಲ್ಲಿ ಭಾರಿ ಮಳೆ ಮತ್ತು ಗಾಳಿಯಿಂದಾಗಿ ನಾಡ ದೋಣಿಗಳಿಗೂ ಸಮುದ್ರಕ್ಕೆ ಇಳಿದು ಮೀನುಗಾರಿಕೆ ನಡೆಸಲು ಸಾಧ್ಯವಾಗಿರಲಿಲ್ಲ.

‘ಈ ತಿಂಗಳ ಕೊನೆಯವರೆಗೆ ಮೀನುಗಾರಿಕೆ ಉತ್ತಮವಾಗಿ ನಡೆಯುವ ನಿರೀಕ್ಷೆ ಇತ್ತು ಆದರೆ. ಮುಂಗಾರು ಪೂರ್ವ ಮಳೆಯೇ ಅಬ್ಬರದಿಂದ ಸುರಿದಿರುವ ಕಾರಣ ಸಮಸ್ಯೆ ಉಂಟಾಗಿದೆ’ ಎಂದು ಮಲ್ಪೆಯ ಮೀನುಗಾರ ರತನ್‌ ತಿಳಿಸಿದರು.

‘ಕಳೆದ ವರ್ಷವಿಡೀ ಮಲ್ಪೆಯಲ್ಲಿ ಶೇ 20ರಷ್ಟು ದೋಣಿಗಳು ದಕ್ಕೆಯಲ್ಲೇ ಉಳಿದಿದ್ದವು. ಮೀನುಗಾರಿಕೆಗೆ ತೆರಳಿದ್ದ ಕೆಲವರಿಗಷ್ಟೇ ಲಾಭ ಸಿಕ್ಕಿದೆ. ಹೆಚ್ಚಿವರಿಗೆ ನಷ್ಟ ಉಂಟಾಗಿದೆ. ಹವಾಮಾನ ವೈಪರೀತ್ಯದ ಜೊತೆಗೆ ಮತ್ಸ್ಯಕ್ಷಾಮವೂ ಮೀನುಗಾರರನ್ನು ಹೈರಾಣು ಮಾಡಿತ್ತು’ ಎಂದು ಮಲ್ಪೆಯ ಮೀನು ವ್ಯಾಪಾರಸ್ಥರ ಸಂಘದ ಅಧ್ಯಕ್ಷ ಸಾಧು ಸಾಲ್ಯಾನ್‌ ತಿಳಿಸಿದರು.

ಊರಿಗೆ ಮರಳುತ್ತಿರುವ ಕಾರ್ಮಿಕರು

ಮಲ್ಪೆಯ ದಕ್ಕೆಯಲ್ಲಿ ಹಾಗೂ ಮೀನುಗಾರಿಕಾ ದೋಣಿಗಳಲ್ಲಿ ಒಡಿಶಾ, ಉತ್ತರ ಪ್ರದೇಶ, ಪಶ್ಚಿಮ ಬಂಗಾಳ, ಆಂಧ್ರಪ್ರದೇಶ ಕಾರ್ಮಿಕರು ಹೆಚ್ಚಿನ ಸಂಖ್ಯೆಯಲ್ಲಿ ದುಡಿಯುತ್ತಿ‌ದ್ದಾರೆ. ಪ್ರತಿ ವರ್ಷ ಟ್ರಾಲಿಂಗ್‌ ನಿಷೇಧ ಜಾರಿಗೆ ಬಂದ ಬಳಿಕ ಅವರು ಊರಿಗೆ ಮರಳುತ್ತಿದ್ದರು. ಈ ವರ್ಷ ಅರ್ಧಕ್ಕಿಂತಲೂ ಹೆಚ್ಚು ಉತ್ತರ ಭಾರತದ ಕಾರ್ಮಿಕರು ಈಗಾಗಲೇ ಊರಿಗೆ ಮರಳಿದ್ದಾರೆ. ಬಲೆ ದುರಸ್ತಿ, ಹೊಸ ಬಲೆ ಸಿದ್ಧಪಡಿಸುವ ಕಾರ್ಯದಲ್ಲೂ ಉತ್ತರ ಭಾರತದ ಕಾರ್ಮಿಕರು ನುರಿತರಾಗಿರುವುದರಿಂದ ಅವರಲ್ಲಿ ಕೆಲವರು ಈ ಕೆಲಸಗಳಿಗಾಗಿ ಮಳೆಗಾಲದಲ್ಲೂ ಮಲ್ಪೆಯಲ್ಲಿ ಉಳಿದುಕೊಳ್ಳುತ್ತಾರೆ. ಬಹುತೇಕರು ತಮ್ಮ ಊರಿಗೆ ಮರಳುತ್ತಾರೆ.