'ತಿಥಿ' ಸಿನಿಮಾ ಮಾದರಿಯಲ್ಲೇ ಮತ್ತೊಂದು ಪ್ರಯೋಗಕ್ಕೆ ಕೈ ಹಾಕಿದ ನಿರ್ದೇಶಕ ರೆಡ್ಡಿ

ಹಲವು ಅಂತರರಾಷ್ಟ್ರೀಯ ಚಲನ ಚಿತ್ರೋತ್ಸವಗಳಲ್ಲಿ ಪ್ರಶಸ್ತಿ ಬಾಚಿಕೊಂಡಿರುವ 'ತಿಥಿ' ಹಾಗೂ ಬರ್ಲಿನ್‌ ಅಂತರರಾಷ್ಟ್ರೀಯ ಚಲನ ಚಿತ್ರೋತ್ಸವದಲ್ಲಿ ಪ್ರದರ್ಶನ ಕಂಡಿರುವ 'ಜುಗ್ನುಮ: ದಿ ಫೆಬಲ್‌' ಸಿನಿಮಾಗಳ ನಿರ್ದೇಶಕ ರಾಮ್‌ ರೆಡ್ಡಿ ಅವರು ಮತ್ತೊಂದು ಪ್ರಯೋಗಕ್ಕೆ ಸಜ್ಜಾಗಿದ್ದಾರೆ.

'ಲ್ಯಾವೆಂಡರ್‌ ಫೈರ್' ಹೆಸರಿನ ಚಿತ್ರದೊಂದಿಗೆ ಸಿನಿಪ್ರಿಯರ ಮುಂದೆ ಬರಲು ತಯಾರಿ ಮಾಡಿಕೊಂಡಿರುವ ರೆಡ್ಡಿ, ಚೊಚ್ಚಲ ಸಿನಿಮಾ 'ತಿಥಿ'ಯಂತೆ ಈ ಬಾರಿಯೂ ಕಲಾವಿದರಲ್ಲದವರನ್ನು ಕಟ್ಟಿಕೊಂಡು ಮುನ್ನಡೆಯಲು ತೀರ್ಮಾನಿಸಿದ್ದಾರೆ.

'ತಿಥಿ ಸಿನಿಮಾಗೆ ಅನುಸರಿಸಿದ್ದ ಮಾದರಿಯಲ್ಲೇ ಕಥೆ ಬರೆಯುತ್ತಿದ್ದೇನೆ. ಮೊದಲು ಪಾತ್ರವರ್ಗಕ್ಕೆ ಬೇಕಾದವರನ್ನು ಆಯ್ಕೆ ಮಾಡಿಕೊಂಡು, ಅವರ ಬಗ್ಗೆ ತಿಳಿದುಕೊಂಡು, ಅವರಿಗೆ ತಕ್ಕಂತೆ ಕಥೆ ಹೆಣೆಯುತ್ತೇನೆ' ಎಂದು ತಿಳಿಸಿದ್ದಾರೆ.

ಹಳ್ಳಿಗಾಡಿನ ಕಥೆ ಆಧಾರಿತ, ಕನ್ನಡದ ಸಿನಿಮಾ 'ತಿಥಿ' 2015ರಲ್ಲಿ ತೆರೆಕಂಡಿತ್ತು. ನಟನೆ ಗೊತ್ತಿಲ್ಲದ ಗ್ರಾಮೀಣ ಜನರೇ ಈ ಸಿನಿಮಾದಲ್ಲಿ ಅಭಿನಯಿಸಿದ್ದರು. ಎರಡನೇ ಸಿನಿಮಾ '.. ದಿ ಫೆಬಲ್‌'ನಲ್ಲಿ ಮನೋಜ್‌ ಬಾಜಪೇಯಿ ಮತ್ತು ತಿಲೋತ್ತಮ ಶೋಮ್ ನಟಿಸಿದ್ದರು.

'ಲ್ಯಾವೆಂಡರ್‌ ಫೈರ್' ಜೆನ್‌ ಝಿ ಕುರಿತಾದ ಕಥೆಯಾಗಿದ್ದು, ರೆಡ್ಡಿ ಅವರು ತಮ್ಮದೇ 'Prspctvs Productions' ಬ್ಯಾನರ್‌ ಅಡಿ ನಿರ್ಮಿಸಲಿದ್ದಾರೆ. ಚಿತ್ರೀಕರಣ 2026ರ ಜನವರಿಯಲ್ಲಿ ಆರಂಭವಾಗಲಿದೆ.

'ತಿಥಿ' ಸಿನಿಮಾಗೆ ಚಿತ್ರಕಥೆ ಬರೆದಿದ್ದ ಈರೇಗೌಡ ಅವರು ರೆಡ್ಡಿಗೆ ಜೊತೆಯಾಗುತ್ತಿದ್ದಾರೆ.

ಈ ರೀತಿಯ ಸಿನಿಮಾಗಳು ಹೆಚ್ಚು ಪ್ರೇಕ್ಷಕರನ್ನು ತಲುಪುವುದು ಸವಾಲಿನ ಸಂಗತಿಯಾದರೂ, ಸೃಜನಾತ್ಮಕ ಕೆಲಸದ ಹಾದಿ ಹಿಡಿದಿದ್ದಾರೆ ರೆಡ್ಡಿ. 'ಈ ಮಾದರಿಯ ಸಿನಿಮಾಗಳತ್ತಲೂ ಆಸಕ್ತಿ ಬೆಳೆಸಿಕೊಳ್ಳುತ್ತಿರುವ ಜನರ ವರ್ಗ ಹೆಚ್ಚಾಗುತ್ತಿದೆ' ಎಂದು ಅವರು ವಿಶ್ವಾಸ ವ್ಯಕ್ತಪಡಿಸಿದ್ದಾರೆ.