ಕೋವಿಡ್‌ 19: ವಿಶ್ವದ ಶೇ 50ರಷ್ಟು ಯುವ ಜನರಲ್ಲಿ ಹೆಚ್ಚಿದ ಖಿನ್ನತೆ
ವಿಶ್ವಸಂಸ್ಥೆ: ವಿಶ್ವದ ಅರ್ಧದಷ್ಟು ಯುವ ಜನರು ಸಂದರ್ಭ, ಸನ್ನಿವೇಶಗಳಿಂದ ಖಿನ್ನತೆ ಅಥವಾ ಆತಂಕಕ್ಕೆ ಒಳಗಾಗುತ್ತಿದ್ದರೆ, ಮೂರನೇ ಒಂದು ಭಾಗದಷ್ಟು ಯುವ ಜನರು ಕೋವಿಡ್‌ 19 ಸಾಂಕ್ರಾಮಿಕ ರೋಗದಿಂದ ಎದುರಾಗಿರುವ ಭವಿಷ್ಯದ ವೃತ್ತಿ ಜೀವನದ ಅನಿಶ್ಚತತೆ, ಅಭದ್ರತೆಯಿಂದ ಬಳಲುತ್ತಿದ್ದಾರೆ ಎಂದು ಅಧ್ಯಯನವೊಂದು ತಿಳಿಸಿದೆ.
ಅಂತರರಾಷ್ಟ್ರೀಯ ಕಾರ್ಮಿಕ ಸಂಘಟನೆಯು (ಐಎಲ್‌ಒ) ‘ಕೋವಿಡ್‌–19: ವೃತ್ತಿ, ಶಿಕ್ಷಣ, ಹಕ್ಕು ಮತ್ತು ಮಾನಸಿಕ ಯೋಗಕ್ಷೇಮದ ಮೇಲಿನ ಪರಿಣಾಮ’ ಕುರಿತುನಡೆಸಿರುವ ಸಮೀಕ್ಷೆಯಿಂದ ಇದು ಗೊತ್ತಾಗಿದೆ. ಈ ಬಗ್ಗೆ ತಕ್ಷಣವೇ ಕ್ರಮ ತೆಗೆದುಕೊಳ್ಳದಿದ್ದರೆ, ಯುವ ಸಮೂಹ ಗಂಭೀರವಾದ ಸಂಕಷ್ಟದಲ್ಲಿ ಸಿಲುಕುತ್ತಾದೆ. ಇದು ಕೋವಿಡ್‌ನಿಂದ ಸಂಭವಿಸುವ ದೀರ್ಘಕಾಲಿಕ ಪರಿಣಾಮವೂ ಆಗಲಿದೆ ಎಂದು ವರದಿಯಲ್ಲಿ ಎಚ್ಚರಿಸಲಾಗಿದೆ.
‘ಕೋವಿಡ್‌ ಬಿಕ್ಕಟ್ಟು ಎದುರಾಗುವುದಕ್ಕೂ ಮುನ್ನ ಯುವ ಸಮೂಹ, ಸಾಮಾಜಿಕ ಮತ್ತು ಆರ್ಥಿಕ ಸವಾಲುಗಳನ್ನು ಎದುರಿಸುವಲ್ಲಿ ನಿರತವಾಗಿತ್ತು. ಈಗ ಕೋವಿಡ್‌, ಜೀವನದ ಪ್ರತಿ ಹಂತದಲ್ಲೂ ಅಡ್ಡಿಯುಂಟು ಮಾಡುತ್ತಿದೆ. ಈಗ ತುರ್ತು ಕ್ರಮ ಕೈಗೊಳ್ಳಬೇಕಿದೆ’ ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.
ಈ ಸಮೀಕ್ಷೆಯಲ್ಲಿ 112 ದೇಶಗಳಿಂದ 12 ಸಾವಿರಕ್ಕೂ ಹೆಚ್ಚು ಮಂದಿಯಿಂದ ಅಭಿಪ್ರಾಯಗಳನ್ನು ಸಂಗ್ರಹಿಸಲಾಗಿದೆ. 18 ರಿಂದ 29 ವಯಸ್ಸಿನೊಳಗಿನ ವಿದ್ಯಾವಂತರು ಮತ್ತು ಅಂತರ್ಜಾಲ ಸೌಕರ್ಯ ಹೊಂದಿರುವವರು ಸಮೀಕ್ಷೆಯಲ್ಲಿಪಾಲ್ಗೊಂಡಿದ್ದರು.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.