ಈ ಮೂರು ಸ್ವಭಾವಗಳ ಅರಿವಿದ್ದರೆ ವ್ಯಕ್ತಿಗಳನ್ನು ಅರ್ಥ ಮಾಡಿಕೊಳ್ಳುವುದು ಸುಲಭ

ಸ್ವಭಾವತಃ ವ್ಯಕ್ತಿಯಿಂದ ವ್ಯಕ್ತಿಗೆ ವಿಶಿಷ್ಟತೆಯನ್ನು ಕಾಣಬಹುದು. ರೂಪ ಹಾಗೂ ವ್ಯಕ್ತಿತ್ವದಲ್ಲೂ ವೈವಿದ್ಯತೆ ಇರುತ್ತದೆ. ಮನೋವಿಜ್ಞಾನದಲ್ಲಿ ವ್ಯಕ್ತಿಗಳ ವರ್ತನೆ ಆಧರಿಸಿ ಅಂತರ್ಮುಖಿ, ಬಹಿರ್ಮುಖಿ ಹಾಗೂ ಉಭಯಮುಖಿ ಎಂದು ವಿಂಗಡಿಸಲಾಗುತ್ತದೆ. ಈ ಕುರಿತು ಮನೋವಿಜ್ಞಾನದ ಪ್ರಾಧ್ಯಾಪಕಿ ಕಾವ್ಯಾ ಅವರು ಮಾಹಿತಿ ನೀಡಿದ್ದಾರೆ. 

ಬಹಿರ್ಮುಖಿ (Extrovert)

• ಇವರು ಸ್ವಭಾವತಃ ಚುರುಕು ಬುದ್ಧಿ ಹಾಗೂ ಅತೀ ಉತ್ಸಾಹಿಗಳಾಗಿರುತ್ತಾರೆ. ಇವರು ಜನರ ಜೊತೆ ಬೆರೆಯಲು ಇಷ್ಟಪಡುತ್ತಾರೆ ಎಂದು ಮನೋವಿಜ್ಞಾನ ಹೇಳುತ್ತದೆ.

• ಹೊಸಬರ ಭೇಟಿ, ಅವರೊಂದಿಗೆ ಮಾತನಾಡುವುದು ಹಾಗೂ ಚಟುವಟಿಕೆಗಳಲ್ಲಿ  ಭಾಗವಹಿಸುವುದು ಇವರಿಗೆ ಶಕ್ತಿ ನೀಡುತ್ತದೆ.

• ಇವರು ತಮ್ಮ ಆಲೋಚನೆ ಮತ್ತು ಭಾವನೆಗಳನ್ನು ಮುಕ್ತವಾಗಿ ಹಂಚಿಕೊಳ್ಳುತ್ತಾರೆ.

• ಸಾಮಾಜಿಕ ಪರಿಸರ ಇವರಿಗೆ ಮನಶಾಂತಿ ಹಾಗೂ ಆತ್ಮವಿಶ್ವಾಸ ಒದಗಿಸುತ್ತದೆ.

• ಮನೋವಿಜ್ಞಾನದಲ್ಲಿ ಬಹಿರ್ಮುಖಿಗಳು ಸಮಾಜದ ಬೇರೆ ಬೇರೆ ವ್ಯಕ್ತಿಗಳಿಂದ ಪ್ರೇರಣೆ ಪಡೆಯುತ್ತಾರೆ.

ಅಂತರ್ಮುಖಿ (Introvert)

• ಇವರು ಶಾಂತ ಸ್ವಭಾವದವರು ಹಾಗೂ ಆಂತರಿಕವಾಗಿ ವಿಚಾರವಂತರೂ ಆಗಿರುತ್ತಾರೆ. ಮಾತ್ರವಲ್ಲ, ಆಳವಾದ ಚಿಂತನೆ ಹೊಂದಿರುತ್ತಾರೆ.

• ಜನ ಸಮೂಹಕ್ಕಿಂತ ಸ್ವಂತದಕ್ಕೆ ಹೆಚ್ಚು ಸಮಯ ಕೊಡುತ್ತಾರೆ.

• ಪ್ರತಿ ಮಾತನ್ನು ಆಲೋಚಿಸಿ ತೂಕವಾಗಿ ಮಾತನಾಡುತ್ತಾರೆ. ಅನೇಕ ಸಂದರ್ಭದಲ್ಲಿ ತಮ್ಮೊಳಗಿನ ಭಾವನೆಗಳನ್ನು ಮುಕ್ತವಾಗಿ ವ್ಯಕ್ತಪಡಿಸದೆ ಒಳಗೆ ಇಟ್ಟುಕೊಳ್ಳುತ್ತಾರೆ.

• ಇವರು ಹೆಚ್ಚು ಸೃಜನಾತ್ಮಕ ಹಾಗೂ ವಿಶ್ಲೇಷಣೆಯ ಮನಸ್ಥಿತಿ ಹೊಂದಿರುತ್ತಾರೆ.

• ‌ಮನೋವಿಜ್ಞಾನದಲ್ಲಿ ಅಂತರ್ಮುಖಿಗಳು ಆಂತರಿಕ ಚಿಂತನೆ ಮತ್ತು ಆತ್ಮವಲೋಕನದಿಂದ ಪ್ರೇರಣೆ ಪಡೆಯುತ್ತಾರೆ.

ಉಭಯಮುಖಿ (Ambivert)

• ಇವರು ಅಂತರ್ಮುಖಿ ಮತ್ತು ಬಹಿರ್ಮುಖಿ ಇಬ್ಬರ ಸಮತೋಲನ ಗುಣಗಳನ್ನು  ಹೊಂದಿರುತ್ತಾರೆ.

• ಇವರು ಪರಿಸ್ಥಿತಿಗೆ ತಕ್ಕಂತೆ ವರ್ತಿಸುತ್ತಾರೆ. (ಕೆಲವೊಮ್ಮೆ ಚುರುಕಾಗಿ, ಕೆಲವೊಮ್ಮೆ ಮೌನವಾಗಿ)

• ಜನರೊಂದಿಗೆ ಬೆರೆಯುವುದನ್ನು ಇಷ್ಟಪಡುತ್ತಾರೆ ಹಾಗೂ ಒಂಟಿಯಾಗಿಯೂ ಇರುತ್ತಾರೆ.

• ಇವರು ಸಾಮಾಜಿಕ ಹಾಗೂ ವೈಯಕ್ತಿಕ ಜೀವನದ ನಡುವೆ ಸಮತೋಲನ ಕಾಯ್ದುಕೊಳ್ಳುತ್ತಾರೆ.