ಎಥೆನಾಲ್ ಉತ್ಪಾದನೆಗೆ ಉತ್ತಮ ಗುಣಮಟ್ಟದ ಅಕ್ಕಿ: ಕೇಂದ್ರದ ವಿರುದ್ಧ ಕಾಂಗ್ರೆಸ್ ವಾಗ್ದಾಳಿ

ಬೆಂಗಳೂರು: ಎಥೆನಾಲ್‌ ಉತ್ಪಾದನೆಗಾಗಿ 2019ರಿಂದ 2023ರವರೆಗೆ ಒಟ್ಟು 29.05 ಲಕ್ಷ ಟನ್‌ ಉತ್ತಮ ಗುಣಮಟ್ಟದ ಅಕ್ಕಿಯನ್ನು ನೀಡಿರುವ ಕೇಂದ್ರ ಸರ್ಕಾರದ ಕ್ರಮವನ್ನು ರಾಜ್ಯ ಕಾಂಗ್ರೆಸ್‌ ಟೀಕಿಸಿದೆ.

ಎಥೆನಾಲ್‌ ಉತ್ಪಾದನೆಗಾಗಿ ಅಕ್ಕಿ ಬಳಕೆಯಾಗುತ್ತಿರುವ ಬಗ್ಗೆ ‘ಪ್ರಜಾವಾಣಿ’ಯ ಜೂನ್‌ 16ರ ಸಂಚಿಕೆಯ ‘ಆಳ–ಅಗಲ’ ವಿಭಾಗದಲ್ಲಿ ವಿಶೇಷ ವರದಿ ಪ್ರಕಟಿಸಲಾಗಿತ್ತು. ಇದೇ ವರದಿಯನ್ನು ಸಾಮಾಜಿಕ ಮಾಧ್ಯಮದಲ್ಲಿ ಹಂಚಿಕೊಂಡಿರುವ ಕಾಂಗ್ರೆಸ್‌ ಪಕ್ಷ, ಕೇಂದ್ರ ಸರ್ಕಾರದ ವಿರುದ್ಧ ವಾಗ್ದಾಳಿ ನಡೆಸಿದೆ.

ಇದನ್ನೂ ಓದಿ: ಎಥೆನಾಲ್‌ ಉತ್ಪಾದನೆಗೆ 29.5 ಲಕ್ಷ ಟನ್‌ ಅಕ್ಕಿ

ಈ ಕುರಿತು ಟ್ವಿಟರ್‌ನಲ್ಲಿ ಪೋಸ್ಟ್‌ ಪ್ರಕಟಿಸಿರುವ ಕಾಂಗ್ರೆಸ್‌, ‘ಎಥೆನಾಲ್ ಉತ್ಪಾದಿಸಲು ಖಾಸಗಿ ಕಂಪೆನಿಗಳಿಗೆ ಉತ್ತಮ ಗುಣಮಟ್ಟದ ಅಕ್ಕಿಯನ್ನು ಕೆ.ಜಿಗೆ ₹24ರಂತೆ ಕೊಡುವ ಭಾರತ ಆಹಾರ ನಿಗಮ (ಎಫ್‌ಸಿಐ) ನಮ್ಮ ಸರ್ಕಾರ ₹34ರಂತೆ ಕೊಡಲು ಮುಂದಾದರೂ ಅಕ್ಕಿ ಕೊಡಲು ಒಪ್ಪದಿರುವುದು ಮೋದಿಯ ದ್ವೇಷ ರಾಜಕಾರಣವಲ್ಲದೆ ಇನ್ನೇನು’ ಎಂದು ಪ್ರಶ್ನೆ ಮಾಡಿದೆ.

‘ಬಳಕೆ ಯೋಗ್ಯ ಧಾನ್ಯಗಳನ್ನೂ ಎಥೆನಾಲ್ ಉತ್ಪಾದನೆಗೆ ಬಳಸಲು ಅನುಮತಿ ಕೊಟ್ಟಿರುವುದರ ಹಿಂದೆ ಜನರ ಹೊಟ್ಟೆಯ ಮೇಲೆ ಹೊಡೆಯುವ ದುರುದ್ದೇಶ ಇರುವುದು ಸ್ಪಷ್ಟವಾಗಿದೆ’ ಎಂದು ಕರ್ನಾಟಕ ಕಾಂಗ್ರೆಸ್‌ ಆಕ್ರೋಶ ವ್ಯಕ್ತಪಡಿಸಿದೆ.

2022–23ನೇ ಆರ್ಥಿಕ ವರ್ಷವೊಂದರಲ್ಲೇ ಸುಮಾರು 16 ಲಕ್ಷ ಟನ್‌ ಉತ್ತಮ ಗುಣಮಟ್ಟದ ಅಕ್ಕಿಯನ್ನು ಎಥೆನಾಲ್‌ ಉತ್ಪಾದನೆಗೆ ಎಫ್‌ಸಿಐ ನೀಡಿದೆ.