ಪ್ರಶ್ನೆಪತ್ರಿಕೆ ಸೋರಿಕೆ | ವೈದ್ಯಕೀಯ ಸೀಟು ರದ್ದು: ಕೆಇಎ

ಬೆಂಗಳೂರು: ನೀಟ್‌–2024ರ ಪ್ರಶ್ನೆ ಪತ್ರಿಕೆ ಸೋರಿಕೆಯಲ್ಲಿ ಭಾಗಿಯಾದ ಆರೋಪ ಸಾಬೀತಾದ ಕಾರಣ ಇಬ್ಬರು ವಿದ್ಯಾರ್ಥಿಗಳ ವೈದ್ಯಕೀಯ ಸೀಟನ್ನು ಕರ್ನಾಟಕ ಪರೀಕ್ಷಾ ಪ್ರಾಧಿಕಾರ (ಕೆಇಎ) ಹಿಂಪಡೆದಿದೆ.

ಶ್ರುತಿ ಪಾಂಡೆ ಅವರಿಗೆ ಬೆಂಗಳೂರಿನ ಕೆಂಪೇಗೌಡ ವೈದ್ಯಕೀಯ ಕಾಲೇಜು, ಪ್ರಿಯಾಲ್‌ ಚೌಹಾಣ್‌ ಅವರಿಗೆ ಮಂಗಳೂರಿನ ಎಜೆ ವೈದ್ಯಕೀಯ ಕಾಲೇಜಿನಲ್ಲಿ ಪ್ರವೇಶ ಸಿಕ್ಕಿತ್ತು. ನೀಟ್‌–2024ರ ಪ್ರಶ್ನೆ ಪತ್ರಿಕೆ ಸೋರಿಕೆ ಪ್ರಕರಣದ ತನಿಖೆ ನಡೆಸಿದ ಸಿಬಿಐ, ರಾಜ್ಯದ ವೈದ್ಯಕೀಯ ಕಾಲೇಜುಗಳಲ್ಲಿ ಸೀಟು ಪಡೆದ ಈ ಇಬ್ಬರು ಭಾಗಿಯಾಗಿರುವುದನ್ನು ದೃಢಪಡಿಸಿತ್ತು. ಸಿಬಿಐ ವರದಿ ಆಧಾರದಲ್ಲಿ ರಾಷ್ಟ್ರೀಯ ವೈದ್ಯಕೀಯ ಆಯೋಗ (ಎನ್‌ಎಂಸಿ) ಆಡಳಿತ ಮಂಡಳಿ ಕೋಟಾದಡಿ ಪಡೆದ ಇಬ್ಬರ ಸೀಟುಗಳನ್ನು ರದ್ದುಗೊಳಿಸಲು ಕೆಇಎಗೆ ಸೂಚಿಸಿತ್ತು. 

ಈ ಇಬ್ಬರೂ ಮೊದಲ ವರ್ಷದ ಎಂಬಿಬಿಎಸ್ ಕೋರ್ಸ್‌ ಪೂರ್ಣಗೊಳಿಸುವ ಹಂತದಲ್ಲಿದ್ದು, ಸೀಟು ರದ್ದು ಮಾಡಿರುವ ಆದೇಶವನ್ನು ಕೆಇಎಯು ಕಾಲೇಜು ಆಡಳಿತ ಮಂಡಳಿಗಳಿಗೆ ಕಳುಹಿಸಿದೆ.