ಜೂನಿಯರ್ ಮಹಿಳಾ ಹಾಕಿ: ಅರ್ಜೆಂಟೀನಾ ವಿರುದ್ಧ ಭಾರತಕ್ಕೆ ಗೆಲುವು

ರೊಸಾರಿಯೊ (ಅರ್ಜೆಂಟೀನಾ): ಭಾರತದ ಗೋಲ್‌ಕೀಪರ್‌ ನಿಧಿ ಅವರು ಪೆನಾಲ್ಟಿ ಶೂಟೌಟ್‌ನಲ್ಲಿ ಅರ್ಜೆಂಟೀನಾ ತಂಡದ ಆಟಗಾರ್ತಿಯರ ನಾಲ್ಕು ಗೋಲು ಯತ್ನಗಳನ್ನು ತಡೆದು ಮಿಂಚಿದರು. ಅವರ ಈ ಉತ್ತಮ ನಿರ್ವಹಣೆಯಿಂದಾಗಿ ಭಾರತ ತಂಡವು ನಾಲ್ಕು ರಾಷ್ಟ್ರಗಳ ಜೂನಿಯರ್ ಮಹಿಳಾ ಹಾಕಿ ಟೂರ್ನಿಯ ಪಂದ್ಯದಲ್ಲಿ ಬುಧವಾರ ಆತಿಥೇಯ ತಂಡವನ್ನು ‘ಪೆನಾಲ್ಟಿ ಶೂಟೌಟ್‌’ನಲ್ಲಿ 2–0 ಯಿಂದ ಸೋಲಿಸಿತು.

ನಿಗದಿ ಅವಧಿಯ ಆಟ 1–1 ಸಮಬಲಗೊಂಡಿತ್ತು.

ನಿಗದಿ ಅವಧಿಯ ಆಟದಲ್ಲಿ ಕನಿಕಾ 44ನೇ ನಿಮಿಷ ಗೋಲು ಗಳಿಸಿದ್ದರು. ಪೆನಾಲ್ಟಿ ಯತ್ನಗಳಲ್ಲಿ ಲಾಲ್ರಿನ್‌ಪುಯಿ ಮತ್ತು ಲಾಲ್ತನ್ತ್‌ಲುವಾಂಗಿ ಚೆಂಡನ್ನು ಗುರಿತಲುಪಿಸಿದರು.

ಅರ್ಜೆಂಟೀನಾ ತಂಡದ ಪರ ಮಿಲಾಗ್ರೊಸ್‌ ಡೆಲ್‌ ವಲೆ ನಿಗದಿ ಅವಧಿಯ 10ನೇ ನಿಮಿಷ ಗೋಲು ಗಳಿಸಿದ್ದರು.

ಭಾರತ ಶುಕ್ರವಾರ ನಡೆಯುವ ಪಂದ್ಯದಲ್ಲಿ ಚಿಲಿ ತಂಡವನ್ನು ಎದುರಿಸಲಿದೆ.