ಮಂಗಳ ಗ್ರಹದ ಶಿಲೆ ಮಾರಾಟ; ₹17 ಕೋಟಿಯಿಂದ ₹34 ಕೋಟಿಗೆ ಹರಾಜು ಸಾಧ್ಯತೆ

ನ್ಯೂಯಾರ್ಕ್‌: 25 ಕೆ.ಜಿ ತೂಕದ (54 ಪೌಂಡ್) ಶಿಲೆಯೊಂದನ್ನು ನ್ಯೂಯಾರ್ಕ್‌ನಲ್ಲಿ ಇದೇ ಬುಧವಾರ ಹರಾಜು ಹಾಕಲಾಗುತ್ತದೆ. ಈ ಶಿಲೆಯ ಬೆಲೆ ₹17 ಕೋಟಿಯಿಂದ ₹34 ಕೋಟಿಯಷ್ಟು ಆಗಲಿದೆ (2ರಿಂದ 4 ಮಿಲಿಯನ್ ಡಾಲರ್) ಎಂದು ಅಂದಾಜಿಸಲಾಗಿದೆ... 

ಈ ಶಿಲೆಗೆ ಇಷ್ಟೊಂದು ಬೆಲೆ ಏಕೆ ಎಂದು ಅಚ್ಚರಿಯಾಗುತ್ತಿದೆಯೇ? ಇದು ಭೂಮಿ ಮೇಲೆ ಈ ವರೆಗೆ ಕಂಡುಬಂದಿರುವ ಮಂಗಳ ಗ್ರಹದ ಶಿಲೆಯ ಅತ್ಯಂತ ದೊಡ್ಡ ತುಣುಕಾಗಿದೆ. ಈ ಕಾರಣಕ್ಕೆ ಈ ಶಿಲೆಗೆ ಅಷ್ಟೊಂದು ಬೆಲೆ!

ಇದನ್ನು ಉಲ್ಕಾಶಿಲೆ ಎಂದೂ ಕರೆಯಲಾಗುತ್ತದೆ. ವಿಶ್ವದ ದೊಡ್ಡ ಹರಾಜು ಸಂಸ್ಥೆ ಸೊದೆಬಿ, ‘ಪ್ರಾಕೃತಿಕ ಇತಿಹಾಸ’ ಧ್ಯೇಯವಾಕ್ಯದಡಿ ಈ ಶಿಲೆಯನ್ನು ಹರಾಜು ಹಾಕುತ್ತಿದೆ. ಮಂಗಳನ ಅಂಗಳದ ಈ ಶಿಲೆಗೆ ‘ಎನ್‌ಡಬ್ಲುಎ 16788’ ಎಂದು ಹೆಸರಿಲಾಗಿದೆ. 

ಜೊತೆಗೆ, ಡೈನೊಸಾರ್‌ನ ಮರಿ ‘ಸೆರಾಟೊಸಾರಸ್‌’ನ ಅಸ್ಥಿಪಂಜರವನ್ನು ಕೂಡ ಹರಾಜು ಹಾಕಲಾಗುತ್ತದೆ. ಈ ಅಸ್ಥಿಪಂಜರವು 6 ಅಡಿಗಿಂತ ಎತ್ತರ ಇದ್ದು, 11 ಅಡಿಯಷ್ಟು ಉದ್ದ ಇದೆ.

ಈ ಮೊದಲು, ರೋಮ್‌ನಲ್ಲಿರುವ ಇಟಲಿಯ ಬಾಹ್ಯಾಕಾಶ ಸಂಸ್ಥೆಯಲ್ಲಿ ಈ ಶಿಲೆಯನ್ನು ಪ್ರದರ್ಶನಕ್ಕೆ ಇಡಲಾಗಿತ್ತು. ಈ ಶಿಲೆಯ ಮಾಲೀಕತ್ವ ಯಾರದು ಎಂಬ ಮಾಹಿತಿಯನ್ನು ಸೊದೆಬಿ ಬಹಿರಂಗಪಡಿಸಿಲ್ಲ.

‘ಯಾವಾಗ ಈ ಶಿಲೆಯು ಭೂಮಿ ಮೇಲೆ ಬಿದ್ದಿದೆ ಎಂಬುದು ಖಚಿತಪಟ್ಟಿಲ್ಲ. ಆದರೆ, ಇತ್ತೀಚಿನ ವರ್ಷಗಳಲ್ಲಿ ಬಿದ್ದಿರುವ ಸಾಧ್ಯತೆಯೇ ಹೆಚ್ಚು’ ಎಂದು ಸೊದೆಬಿ ಹೇಳಿದೆ.

‘ಎನ್‌ಡಬ್ಲುಎ 16788’ ಕುರಿತ ವಿವರಗಳು

• ಬೃಹತ್‌ ಕ್ಷುದ್ರಗ್ರಹವೊಂದು ಭೂಮಿಯತ್ತ ಬರುವ ವೇಳೆ ಮಂಗಳ ಗ್ರಹಕ್ಕೆ ಡಿಕ್ಕಿ ಹೊಡೆದಿದೆ. ಈ ವೇಳೆ ಈ ಉಲ್ಕಾಶಿಲೆಯು 14 ಕೋಟಿ ಮೈಲು ದೂರ ಕ್ರಮಿಸಿದ ಬಳಿಕ ನೈಜರ್‌ ದೇಶದ ಸಹರಾ ಮರಭೂಮಿಯಲ್ಲಿ ಬಿದ್ದಿದೆ. ಉಲ್ಕೆಗಳ ಕುರಿತು ಅಧ್ಯಯನ ಮಾಡುವವರು 2023ರ ನವೆಂಬರ್‌ನಲ್ಲಿ ಇದನ್ನು ಪತ್ತೆ ಹಚ್ಚಿದ್ದಾರೆ.

• ಈ ಶಿಲೆಯು ಕೆಂಪು ಬೂದು ಹಾಗೂ ಕಂದು ಬಣ್ಣ ಹೊಂದಿದೆ. ಭೂಮಿ ಮೇಲೆ ಈ ವರೆಗೆ ಕಂಡುಬಂದಿರುವ ಮಂಗಳ ಗ್ರಹದ ಬೃಹತ್‌ ಶಿಲೆಗಿಂತ ಇದು ಶೇ 70ರಷ್ಟು ದೊಡ್ಡದಿದೆ .

• ಇದರ ಉದ್ದ 15 ಇಂಚು ಇದ್ದು ಅಗಲ 11 ಹಾಗೂ ಎತ್ತರ 6 ಇಂಚು ಇದೆ.

• ಭೂಮಿಯಲ್ಲಿ ಈ ವರೆಗೆ 77 ಸಾವಿರಕ್ಕೂ ಅಧಿಕ ಉಲ್ಕಾಶಿಲೆಗಳು ಪತ್ತೆಯಾಗಿವೆ. ಈ ಪೈಕಿ ಮಂಗಳ ಗ್ರಹದ ಶಿಲೆಗಳ ಸಂಖ್ಯೆ ಕೇವಲ 400.

• ಇದು ಗಾಜಿನಂತಹ ಮೇಲ್ಮೈ ಹೊಂದಿದೆ. ಭೂಮಿಗೆ ಅಪ್ಪಳಿಸುವ ವೇಳೆ ಅಧಿಕ ಉಷ್ಣತೆಯಿಂದಾಗಿ ದಹನಗೊಂಡಿರುವುದು ಇಂತಹ ಮೇಲ್ಮೈಗೆ ಕಾರಣವಾಗಿರುವ ಸಾಧ್ಯತೆ ಇದೆ ಎಂಬುದು ವಿಜ್ಞಾನಿಗಳ ವಿಶ್ಲೇಷಣೆ