ಕೇಂದ್ರ ಬಜೆಟ್‌ ದಿನವೇ ವಾಣಿಜ್ಯ ಬಳಕೆ ಸಿಲಿಂಡರ್‌ ದರ ₹7ರಷ್ಟು ಇಳಿಕೆ

ನವದೆಹಲಿ: ಸರ್ಕಾರಿ ಸ್ವಾಮ್ಯದ ತೈಲ ಕಂಪನಿಗಳು ವಾಣಿಜ್ಯ ಬಳಕೆಯ ಸಿಲಿಂಡರ್‌ ದರ ಇಳಿಕೆ ಮಾಡಿದ್ದು, ವಿಮಾನ ಇಂಧನದ ದರವನ್ನು (ಎಟಿಎಫ್‌) ಏರಿಕೆ ಮಾಡಿವೆ. ಪರಿಷ್ಕೃತ ದರವು ಶನಿವಾರದಿಂದಲೇ ಜಾರಿಗೆ ಬಂದಿದೆ.

ವಾಣಿಜ್ಯ ಬಳಕೆಯ ಉದ್ದೇಶಕ್ಕಾಗಿ ಬಳಸುವ 19 ಕೆ.ಜಿ ತೂಕದ ಸಿಲಿಂಡರ್‌ ಬೆಲೆಯಲ್ಲಿ ₹7 ಇಳಿಕೆಯಾಗಿದೆ. ದೆಹಲಿಯಲ್ಲಿ ಸಿಲಿಂಡರ್‌ ದರ 1,797 ಆಗಿದ್ದರೆ ಮುಂಬೈನಲ್ಲಿ ₹1,749, ಕೋಲ್ಕತ್ತದಲ್ಲಿ 1,907, ಚೆನ್ನೈನಲ್ಲಿ 1,959 ಮತ್ತು ಬೆಂಗಳೂರಿನಲ್ಲಿ ₹1,874 ರಷ್ಟಿದೆ. ಉಳಿದಂತೆ ಗೃಹ ಬಳಕೆಗೆ ಬಳಸುವ 14 ಕೆ.ಜಿ ತೂಕದ ಸಿಲಿಂಡರ್‌ ದರವು ಯಥಾಸ್ಥಿತಿಯಲ್ಲಿದ್ದು, ₹803ರಷ್ಟಿದೆ.

ವಿಮಾನಗಳಲ್ಲಿ ಬಳಸುವ ಇಂಧನ (ಎಟಿಎಫ್‌) ದರವು ಪ್ರತಿ ಕಿಲೋ ಲೀಟರ್‌ಗೆ (1 ಸಾವಿರ ಲೀಟರ್) ₹5,078 (ಶೇ 5.6ರಷ್ಟು) ಏರಿಕೆ ಮಾಡಲಾಗಿದೆ. ಪರಿಷ್ಕೃತ ದರ ದೆಹಲಿಯಲ್ಲಿ ₹95,533ರಷ್ಟಿದ್ದು, ಮುಂಬೈಯಲ್ಲಿ ₹84,511 ಆಗಿದೆ.

2024ರ ನವೆಂಬರ್ 1ರಂದು ಪ್ರತಿ ಕಿಲೋ ಲೀಟರ್‌ಗೆ ₹2,941 (ಶೇ 3.3), ಮತ್ತು ಡಿಸೆಂಬರ್ 1ರಂದು ಪ್ರತಿ ಕಿಲೋ ಲೀಟರ್‌ಗೆ ₹1,318.12 (ಶೇ 1.45) ಏರಿಕೆ ಮಾಡಲಾಗಿತ್ತು.