₹12 ಸಾವಿರ ಕೋಟಿ ಹೂಡಿಕೆಗೆ ಚೀನಾದಿಂದ ಕೇಂದ್ರಕ್ಕೆ ಹಲವು ಪ್ರಸ್ತಾವನೆಗಳು

ನವದೆಹಲಿ: ಏಪ್ರಿಲ್‌ನಿಂದ ಇಲ್ಲಿಯವರೆಗೆ ಚೀನಾದಿಂದ ₹ 12 ಸಾವಿರ ಕೋಟಿ ಮೌಲ್ಯದ 120 ವಿದೇಶಿ ನೇರ ಬಂಡವಾಳ ಹೂಡಿಕೆ (ಎಫ್‌ಡಿಐ) ಪ್ರಸ್ತವಾನೆಗಳು ಸರ್ಕಾರಕ್ಕೆ ಬಂದಿವೆ ಎಂದು ಮೂಲಗಳು ತಿಳಿಸಿವೆ.

ಭಾರತದ ಜತೆ ಗಡಿ ಹಂಚಿಕೊಂಡಿರುವ ದೇಶಗಳಿಂದ ಬರುವ ವಿದೇಶಿ ನೇರ ಬಂಡವಾಳ ಹೂಡಿಕೆಗೆ (ಎಫ್‌ಡಿಐ) ಕೇಂದ್ರ ಸರ್ಕಾರದ ಪೂರ್ವಾನುಮತಿ ಕಡ್ಡಾಯ ಎಂಬ ನಿಯಮ ರೂಪಿಸಲಾಗಿದೆ. ಇದರಿಂದಾಗಿ ಈ ಪ್ರಸ್ತಾವನೆಗಳು ಸರ್ಕಾರಕ್ಕೆ ಸಲ್ಲಿಕೆಯಾಗಿವೆ ಎಂದು ಮೂಲಗಳು ಹೇಳಿವೆ.

ಎಫ್‌ಡಿಐ ಪ್ರಸ್ತಾವನೆಗಳನ್ನು ಪರಿಶೀಲಿಸಲು ಆಂತರಿಕ ಸಮಿತಿಯನ್ನು ರಚಿಸಲಾಗಿದೆ. ಬಹುತೇಕ ಹೂಡಿಕೆಗಳು ಹಾಲಿ ಅಸ್ತಿತ್ವದಲ್ಲಿ ಇರುವ ಭಾರತೀಯ ಕಂಪನಿಗಳ ಮೇಲಿನದ್ದಾಗಿದೆ ಎಂದು ಹೇಳಿವೆ.

2000ನೆ ಇಸವಿಯ ಏಪ್ರಿಲ್‌ನಿಂದ 2020ರ ಸೆಪ್ಟೆಂಬರ್‌ ತಿಂಗಳವರೆಗೆ ಒಟ್ಟಾರೆ ₹ 15,526 ಕೋಟಿ ಮೌಲ್ಯದ ಎಫ್‌ಡಿಐ ಚೀನಾದಿಂದ ಬಂದಿದೆ. ಚೀನಾದ ಕೆಲವು ಕಂಪನಿಗಳು ಸರ್ಕಾರದ ಗುತ್ತಿಗೆ ಒಪ್ಪಂದ ಪಡೆಯುವ ಸಲುವಾಗಿ ನೋಂದಾಯಿಸಿಕೊಳ್ಳಲು ಅರ್ಜಿ ಸಲ್ಲಿಸಿವೆ. ಈ ಪ್ರಸ್ತಾವನೆಗಳನ್ನು ಗೃಹ ಸಚಿವಾಲಯಕ್ಕೆ ಕಳುಹಿಸಲಾಗಿದೆ ಎಂದು ಗೊತ್ತಾಗಿದೆ.