ಕ್ಷಿಪಣಿ ದಾಳಿ; ದೆಹಲಿಯಿಂದ ಇಸ್ರೇಲ್‌ಗೆ ಹೊರಟ ವಿಮಾನ ಅಬುಧಾಬಿಗೆ ಮಾರ್ಗ ಬದಲು

ನವದೆಹಲಿ: ಇಸ್ರೇಲ್‌ನ ವಿಮಾನ ನಿಲ್ದಾಣದ ಸಮೀಪ ಕ್ಷಿಪಣಿ ದಾಳಿ ನಡೆದಿರುವ ಹಿನ್ನೆಲೆಯಲ್ಲಿ ದೆಹಲಿಯಿಂದ ಟೆಲ್ ಅವಿವ್‌ಗೆ ಹೊರಟಿದ್ದ ಏರ್ ಇಂಡಿಯಾ ವಿಮಾನವು ಅಬುಧಾಬಿಗೆ ಮಾರ್ಗ ಬದಲಿಸಿದೆ ಎಂದು ಮೂಲಗಳು ಇಂದು (ಭಾನುವಾರ) ತಿಳಿಸಿವೆ.

ಏರ್ ಇಂಡಿಯಾದ ಬೋಯಿಂಗ್ 787 ವಿಮಾನವು, ಟೆಲ್ ಅವಿವ್‌ನಲ್ಲಿ ಇಳಿಯಲು ಇನ್ನೇನು ಒಂದು ತಾಸಿಗೂ ಕಡಿಮೆ ಅವಧಿ ಇದ್ದ ಸಂದರ್ಭದಲ್ಲಿ ಈ ದಾಳಿ ನಡೆದಿದೆ ಎಂದು ಹೇಳಲಾಗಿದೆ.

ಪ್ರಸ್ತುತ ಎಐ 139 ವಿಮಾನವು ದೆಹಲಿಗೆ ಹಿಂತಿರುಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ವಿಮಾನಗಳ ಟ್ರ್ಯಾಕಿಂಗ್ ವೆಬ್‌ಸೈಟ್ ಆದ Flightradar24.com ಪರಿಶೀಲಿಸಿದಾಗ ಈ ವಿಮಾನವು ಅಬುಧಾಬಿಗೆ ಮಾರ್ಗ ಬದಲಿಸುವಾಗ ಜೋರ್ಡನ್‌‌ನ ವಾಯುಪ್ರದೇಶದಲ್ಲಿತ್ತು.

ಮತ್ತೊಂದೆಡೆ ಟೆಲ್ ಅವಿವ್‌ನಿಂದ ದೆಹಲಿಯತ್ತ ಇಂದು ಪ್ರಯಾಣಿಸಬೇಕಿದ್ದ ವಿಮಾನವನ್ನು ರದ್ದುಗೊಳಿಸಲಾಗಿದೆ.

ಯೆಮನ್‌ ಉಡಾಯಿಸಿದ ಕ್ಷಿಪಣಿ ಟೆಲ್ ಅವಿವ್ ವಿಮಾನ ನಿಲ್ದಾಣದ ಸಮೀಪ ಅಪ್ಪಳಿಸಿದ ಪರಿಣಾಮ ವಿಮಾನ ಸಂಚಾರವನ್ನು ತಾತ್ಕಾಲಿಕವಾಗಿ ಸ್ಧಗಿತಗೊಳಿಸಲಾಗಿದೆ.