ಶಿಡ್ಲಘಟ್ಟ | ಶೌಚಾಲಯವಿಲ್ಲದೆ ವೃದ್ಧರು, ಮಹಿಳೆಯರ ಪರದಾಟ

ಶಿಡ್ಲಘಟ್ಟ: 2011ನೇ ಜನಗಣತಿಯ ಪ್ರಕಾರ ನಗರದ ಜನಸಂಖ್ಯೆ 50 ಸಾವಿರ. ಈಗ ಇನ್ನೂ ಹೆಚ್ಚಿದೆ. ನಗರಕ್ಕೆ ಬಂದು ಹೋಗುವವರ ಸಂಖ್ಯೆಯನ್ನೂ ಪರಿಗಣಿಸಿಕೊಂಡು ಗಮನಿಸಿದರೆ, ನಗರದಲ್ಲಿ ಸಾರ್ವಜನಿಕರ ಶೌಚಾಲಯ ಎರಡು ದಿಕ್ಕಿನಲ್ಲಿ ಎರಡು ಮಾತ್ರ ಮಾತ್ರ ಇವೆ.

ಒಂದು ಪ್ರವಾಸಿ ಮಂದಿರದ ಹೊರಗೆ ಇದ್ದರೆ ಮತ್ತೊಂದು ನಗರದ ಬಸ್ ನಿಲ್ದಾಣದ ಒಳಗೆ. ಬಸ್ ನಿಲ್ದಾಣದ ಬಳಿ ಹಣ್ಣು ಅಂಗಡಿಗಳ ಪಕ್ಕ ಇರುವುದು ಮತ್ತು ಸಂತೆ ಬೀದಿಯ ಬೋವಿ ಕಾಲೋನಿಯಲ್ಲಿ ಇರುವುದು ನಿರ್ವಹಣೆಯಿಲ್ಲದೆ ಬೀಗ ಜಡಿಯಲಾಗಿದೆ.

ನಗರದಲ್ಲಿ ಇರುವುದು ಎರಡು ಪ್ರಮುಖ ರಸ್ತೆಗಳು. ಒಂದು ಅಶೋಕ ರಸ್ತೆಯಾದರೆ ಮತ್ತೊಂದು ಟಿ.ಬಿ.ರಸ್ತೆ. ಊರಿನ ಹಳೆಯ ರಸ್ತೆ ಎನಿಸಿರುವ ಅಶೋಕ ರಸ್ತೆಯಲ್ಲಿ ನಗರಸಭೆ, ಸರ್ಕಾರಿ ಶಾಲೆ, ಕ್ಷೇತ್ರ ಶಿಕ್ಷಣಾಧಿಕಾರಿ ಕಚೇರಿ, ಹಲವು ದೇವಸ್ಥಾನ, ರಸ್ತೆಯುದ್ದಕ್ಕೂ ಅಂಗಡಿ ಮುಂಗಟ್ಟುಗಳು ಇವೆ. ಟಿ.ಬಿ.ರಸ್ತೆಯು ಬಸ್ ನಿಲ್ದಾಣದಿಂದ ಪ್ರಾರಂಭವಾಗಿ ಕೋಟೆ ವೃತ್ತದ ಮೂಲಕ ಹಾದು ತಾಲ್ಲೂಕು ಕಚೇರಿವರೆಗೂ ಸಾಗುತ್ತದೆ. ಈ ರಸ್ತೆಯಲ್ಲಿಯೂ ಹಲವು ದೇವಸ್ಥಾನ, ಸಾಕಷ್ಟು ಅಂಗಡಿ, ಸರ್ಕಾರಿ ಕಚೇರಿಗಳು ಇವೆ. ಎರಡೂ ಜನನಿಬಿಡ ರಸ್ತೆಗಳಾಗಿವೆ. ಆದರೆ ಸಮರ್ಪಕ ಸಾರ್ವಜನಿಕ ಶೌಚಾಲಯ ಇರದ ಕಾರಣ ಜನರು ಪರದಾಡುವ ಪರಿಸ್ಥಿತಿ ಇದೆ.

ಮಧುಮೇಹದಿಂದ ಬಳಲುವ ಹಿರಿಯರಂತೂ ತುಂಬಾ ಕಷ್ಟಪಡುತ್ತಾರೆ. ಗಂಡಸರು ಹಳೆಯ ಕಟ್ಟಡ, ಚರಂಡಿ, ರೈಲ್ವೆ ನಿಲ್ದಾಣದ ಹೊರಗೆ ಬೆಳೆದಿರುವ ಗಿಡಮರಗಳ ಬಳಿ ಹೋಗಿ ಮೂತ್ರ ವಿಸರ್ಜಿಸುವರು. ಆದರೆ ಮಹಿಳೆಯರ ಕಷ್ಟ ಹೇಳಲಿಕ್ಕಾಗದು. ಐ.ಬಿ ಹೊರಗಡೆ ಖಾಸಗಿಯವರು ನಿರ್ವಹಣೆ ಮಾಡುತ್ತಿರುವ ಸಾರ್ವಜನಿಕ ಶೌಚಾಲಯಗಳಲ್ಲಿಯೂ ಸಹ ಶುಚಿತ್ವ ಸಾಲದಾಗಿದೆ. ತಾಲ್ಲೂಕು ಕಚೇರಿ, ಪಂಚಾಯಿತಿ, ಪೊಲೀಸ್ ಠಾಣೆ, ಪುರಸಭೆ, ಬಿಇಒ ಕಚೇರಿ, ಲೋಕೋಪಯೋಗಿ ಇಲಾಖೆಗಳ ಕಚೇರಿಗಳಲ್ಲಿ ಸಾರ್ವಜನಿಕರಿಗೆ ಶೌಚಾಲಯ ಇಲ್ಲ.

ಶಿಡ್ಲಘಟ್ಟ ತಾಲ್ಲೂಕಿನಲ್ಲಿ 274 ಗ್ರಾಮಗಳು, 28 ಗ್ರಾಮ ಪಂಚಾಯಿತಿಗಳು ಮತ್ತು ನಾಲ್ಕು ಹೋಬಳಿಗಳಿವೆ. ಒಂದಿಲ್ಲೊಂದು ಕೆಲಸಕ್ಕೆಂದು ಗ್ರಾಮೀಣ ಭಾಗದಿಂದ ಜನರು ನಗರಕ್ಕೆ ಬಂದೇ ಬರುತ್ತಾರೆ. ದೂರದಿಂದ ಬರುವವರಿಗೆ ಅದರಲ್ಲೂ ಮಹಿಳೆಯರು, ಹೆಣ್ಣುಮಕ್ಕಳು, ವೃದ್ಧರು ಅಗತ್ಯವಾದ ಸಾರ್ವಜನಿಕ ಶೌಚಾಲಯ ಇಲ್ಲದೇ ತುಂಬಾ ಕಷ್ಟಪಡುವಂತಾಗಿದೆ. ಈ ಬಗ್ಗೆ ಕನಿಷ್ಠ ಗಮನವೂ ಹರಿಸದ ಜನಪ್ರತಿನಿಧಿಗಳ ನಿರ್ಲಕ್ಷ್ಯ ಧೋರಣೆಯನ್ನು ಜನರು ಹಿಡಿಶಾಪ ಹಾಕುವ ಮೂಲಕ ವ್ಯಕ್ತಪಡಿಸುತ್ತಿದ್ದಾರೆ.