ಬಾಹುಬಲಿ ಚಿತ್ರದ ಎರಡೂ ಭಾಗಗಳನ್ನೊಳಗೊಂಡ ‘ಬಾಹುಬಲಿ: ದಿ ಎಪಿಕ್’ ಅ.31ಕ್ಕೆ ತೆರೆಗೆ

ಮುಂಬೈ: ಭಾರತೀಯ ಸಿನಿಮಾ ಕ್ಷೇತ್ರವನ್ನು ಹೊಸ ದಿಕ್ಕಿಗೆ ಕೊಂಡೊಯ್ದ ಬಾಹುಬಲಿ ಸಿನಿಮಾ ತೆರೆಕಂಡು 10 ವರ್ಷಗಳು ಕಳೆದಿವೆ. ಈ ಸಂದರ್ಭದಲ್ಲಿ ನಿರ್ದೇಶಕ ಎಸ್.ಎಸ್‌. ರಾಜಮೌಳಿ ಅವರು ಬಾಹುಬಲಿ 1(ಆರಂಭ) ಹಾಗೂ ಬಾಹುಬಲಿ 2 (ಮುಕ್ತಾಯ) ಎರಡೂ ಭಾಗಗಳ ಸಂಯೋಜನೆಯ ‘ಬಾಹುಬಲಿ: ದಿ.ಎಪಿಕ್‌’ ಅನ್ನು ಬಿಡುಗಡೆ ಮಾಡುವುದಾಗಿ ಘೋಷಿಸಿದ್ದಾರೆ. 

ಅಕ್ಟೋಬರ್‌ 31ರಂದು ಬಾಹುಬಲಿ: ದಿ.ಎಪಿಕ್‌’ ಚಿತ್ರ ತೆರೆಕಾಣುತ್ತಿದೆ.

ಈ ಕುರಿತು ಸಾಮಾಜಿಕ ಮಾಧ್ಯಮ ಎಕ್ಸ್‌ನಲ್ಲಿ ಪ್ರಭಾಸ್‌ ಅವರ ಹೊಸ ಪೋಸ್ಟರ್‌ ಹಂಚಿಕೊಂಡಿದ್ದಾರೆ. ‘ಬಾಹುಬಲಿ ಅನೇಕ ಹೊಸ ಪಯಣದ ಆರಂಭವಾಗಿದೆ. ಲೆಕ್ಕಿಸದಷ್ಟು ನೆನಪುಗಳು, ಸ್ಫೂರ್ತಿಯನ್ನು ನೀಡಿದೆ. ಅದಕ್ಕೆ 10 ವರ್ಷಗಳು ಕಳೆದಿವೆ. ಈಗ  ಹೊಸ ಮೈಲಿಗಲ್ಲು ಸ್ಥಾಪಿಸಲು, ಎರಡೂ ಭಾಗಗಳ ಸಂಯೋಜನೆಯ ‘ಬಾಹುಬಲಿ: ದಿ.ಎಪಿಕ್‌’ ಇದೆ ಅಕ್ಟೋಬರ್‌ 31ರಂದು ತೆರೆಕಾಣುತ್ತಿದೆ. ತನ್ನ ಗತಕಾಲದ ಬಗ್ಗೆ ಸತ್ಯವನ್ನು ತಿಳಿದುಕೊಂಡು ಸಿಂಹಾಸನವನ್ನು ಪಡೆಯುವ ವ್ಯಕ್ತಿಯ ಕಥೆಯನ್ನು ಚಿತ್ರ ಹೇಳುತ್ತದೆ’ ಎಂದು ಬರೆದುಕೊಂಡಿದ್ದಾರೆ.

ಈ ಚಿತ್ರ ತೆಲುಗು, ತಮಿಳು, ಮಲಯಾಳಂ, ಹಿಂದಿಯಲ್ಲಿ ತೆರೆಕಾಣುತ್ತಿದೆ. ನಟ ಪ್ರಭಾಸ್, ರಾಣಾ ದಗ್ಗುಬಾಟಿ, ಅನುಷ್ಕಾ ಶೆಟ್ಟಿ, ತಮ್ಮನ್ನಾ ಭಾಟಿಯಾ ಎಲ್ಲರನ್ನೂ ಒಳಗೊಂಡ ಚಿತ್ರ ಇದಾಗಿದೆ.

ಬಾಹುಬಲಿ ಚಿತ್ರದ ಮೊದಲ ಭಾಗ 2015ರಲ್ಲಿ ಹಾಗೂ ಎರಡನೇ ಭಾಗ 2017ರಲ್ಲಿ ಬಿಡುಗಡೆಯಾಗಿತ್ತು.