ಅಕ್ರಮ ಮೀನುಗಾರಿಕೆ: ಬಾಂಗ್ಲಾದ 2 ಹಡಗು ಸೇರಿ 78 ಮೀನುಗಾರರನ್ನು ಬಂಧಿಸಿದ ಭಾರತ

ಪಾರಾದೀಪ್ (ಒಡಿಶಾ): ಭಾರತದ ಜಲಗಡಿಯಲ್ಲಿ ಮೀನುಗಾರಿಕೆ ಮಾಡುತ್ತಿದ್ದ ಆರೋಪದಡಿ ಬಾಂಗ್ಲಾದ 78 ಮೀನುಗಾರರನ್ನು ಬಂಧಿಸಲಾಗಿದೆ ಎಂದು ಭಾರತದ ನೌಕಾಪಡೆ ತಿಳಿಸಿದೆ.

ಅಕ್ರಮವಾಗಿ ಮೀನುಗಾರಿಗೆ ಮಾಡುತ್ತಿದ್ದ ಮೀನುಗಾರರು ಮತ್ತು ಎರಡು ದೋಣಿಗಳನ್ನು ನೌಕಾಪಡೆಯು ಇಂದು (ಮಂಗಳವಾರ) ವಶಪಡಿಸಿಕೊಂಡಿದೆ.

ಎಫ್‌ವಿ ಲೈಲಾ-2 ಮತ್ತು ಎಫ್‌ವಿ ಮೇಘನಾ-5 ಹಡಗುಗಳು ಅಂತರರಾಷ್ಟ್ರೀಯ ಕಡಲ ಗಡಿ ರೇಖೆ (ಐಎಂಬಿಎಲ್) ಬಳಿ ಭಾರತದ ಜಲಗಡಿಯಲ್ಲಿ ಅಕ್ರಮವಾಗಿ ಮೀನುಗಾರಿಕೆ ನಡೆಸುತ್ತಿರುವುದು ಕಂಡುಬಂದಿದೆ. ಇದರಿಂದಾಗಿ ಅಂತರರಾಷ್ಟ್ರೀಯ ಕಡಲ ಕಾನೂನುಗಳು ಮತ್ತು ದ್ವಿಪಕ್ಷೀಯ ಒಪ್ಪಂದಗಳನ್ನು ಉಲ್ಲಂಘಿಸಿದಂತಾಗಿದೆ ಎಂದು ನೌಕಾಪಡೆ ಅಧಿಕಾರಿಗಳು ಹೇಳಿದ್ದಾರೆ.

ಎಫ್‌ವಿ ಲೈಲಾ-2ರಲ್ಲಿ 41 ಮೀನುಗಾರರು ಇದ್ದರೆ, ಎಫ್‌ವಿ ಮೇಘನಾ-5ರಲ್ಲಿ 37 ಮೀನುಗಾರರು ಇದ್ದರು ಎಂದು ನೌಕಾಪಡೆ ಅಧಿಕಾರಿಗಳು ಪ್ರಕಟಣೆಯಲ್ಲಿ ತಿಳಿಸಿದ್ದಾರೆ.

ತಪಾಸಣೆ ನಡೆಸಿದಾಗ ಎರಡು ಹಡಗುಗಳಲ್ಲಿ ಸುಮಾರು 160 ಟನ್ ಮೀನುಗಳು ಪತ್ತೆಯಾಗಿವೆ. ಹೆಚ್ಚಿನ ತನಿಖೆಗಾಗಿ ಹಡಗುಗಳು ಮತ್ತು ಮೀನುಗಾರರನ್ನು ವಶಕ್ಕೆ ಪಡೆಯಲಾಗಿದೆ ಎಂದು ವರದಿಯಾಗಿದೆ.