Russia Plane Crash | ರಷ್ಯಾದ ವಿಮಾನ ಪತನ: ಐವರು ಮಕ್ಕಳು ಸೇರಿ 49 ಮಂದಿ ಸಾವು

ಮಾಸ್ಕೊ: ರಷ್ಯಾದ ಆ್ಯಂಟೊನೊವ್‌–24 (ಎಎನ್‌–24) ವಿಮಾನವು ಪತನಗೊಂಡ ಪರಿಣಾಮ, ಆರು ಸಿಬ್ಬಂದಿ ಸೇರಿ 49 ಮಂದಿ ಸ್ಥಳದಲ್ಲೇ ಮೃತಪಟ್ಟಿದ್ದಾರೆ.

ಪತನಗೊಂಡ ವಿಮಾನದ ಅವಶೇಷಗಳು ರಷ್ಯಾದ ಪೂರ್ವ ಭಾಗದಲ್ಲಿ ಸುಟ್ಟು ಕರಕಲಾದ ಸ್ಥಿತಿಯಲ್ಲಿ ಪತ್ತೆಯಾಗಿವೆ ಎಂದು ಸ್ಥಳೀಯ ತುರ್ತು ಸೇವೆಗಳ ವಿಭಾಗವು ಗುರುವಾರ ತಿಳಿಸಿದೆ.

ವಿಮಾನವು ರಷ್ಯಾ–ಚೀನಾ ಗಡಿ ಸಮೀಪದ ಬ್ಲಗವೆಶ್ಚೆನ್ಸ್‌ ನಗರದಿಂದ ಟಿಂಡಾ ಪ್ರದೇಶಕ್ಕೆ ತೆರಳುತ್ತಿದ್ದ ಸಂದರ್ಭದಲ್ಲಿ ದುರಂತ ಸಂಭವಿಸಿದೆ. ಅವಘಡದ ವೇಳೆ ವಿಮಾನದಲ್ಲಿ ಐವರು ಮಕ್ಕಳು ಇದ್ದರು ಎಂದು ಅಧಿಕಾರಿಗಳು ಮಾಹಿತಿ ನೀಡಿದ್ದಾರೆ.

ಟಿಂಡಾ ವಿಮಾನ ನಿಲ್ದಾಣದಿಂದ ಕೆಲವೇ ಕಿಲೋಮೀಟರ್‌ ದೂರದಲ್ಲಿದ್ದಾಗ ವಿಮಾನವು ಸಂಪರ್ಕ ಕಳೆದುಕೊಂಡಿತ್ತು ಎಂದು ಅವರು ತಿಳಿಸಿದ್ದಾರೆ.