ಶಿವ ಶಂಭೋ ಸ್ವಯಂಭೋ ಹಾಡಿನ ಪ್ರೊಮೋ ಬಿಡುಗಡೆ ಮಾಡಿದ ಹೊಂಬಾಳೆ ಫಿಲ್ಮ್ಸ್

ಹೊಂಬಾಳೆ ಫಿಲ್ಮ್ಸ್ ಸಂಸ್ಥೆಯು ‘ಶಿವ ಶಂಭೋ ಸ್ವಯಂಭೋ’ ಹಾಡಿನ ಪ್ರೊಮೋವನ್ನು ಸಾಮಾಜಿಕ ಮಾಧ್ಯಮದಲ್ಲಿ ಬಿಡುಗಡೆ ಮಾಡಿದೆ. ‘ಭಕ್ತಿಯ ಅಲೆ ಆರಂಭವಾಗಿದೆ’ ಎಂಬ ಅಡಿಬರಹ ನೀಡಿ ಪ್ರೇಕ್ಷಕರಲ್ಲಿ ಕುತೂಹಲ ಮೂಡಿಸಿದೆ.

ಬಿಡುಗಡೆಗೊಂಡ ಹಾಡಿನ ಪ್ರೊಮೋದಲ್ಲಿ, ‘ಎಐ ತಂತ್ರಜ್ಞಾನದ ಮೂಲಕ ಬ್ರಹ್ಮಾಂಡ, ಕೈಲಾಸದ ಕಲ್ಪನೆ ಹಾಗೂ ಶಿವನ ಸ್ವರೂಪವನ್ನು' ನೋಡಬಹುದು. 20ಸೆಕೆಂಡಿನ ವಿಡಿಯೊ ಪ್ರೇಕ್ಷಕರನ್ನು ಸೆಳೆದಿದೆ. ಫೆ. 15ರ ಶಿವರಾತ್ರಿಯಂದು ಬೆಳಗ್ಗೆ 10ಗಂಟೆಗೆ ಪೂರ್ತಿ ಹಾಡು ಅನಾವರಣಗೊಳ್ಳಲಿದೆ.

ಈ ಹಾಡಿಗೆ  ಸ್ವಾಮಿ ದಯಾನಂದ ಸರಸ್ವತಿ ಅವರು ಸಾಹಿತ್ಯ ಬರೆದು, ಸಂಯೋಜನೆ ಮಾಡಿದ್ದಾರೆ, ನಾರಾಯಣ್ ಶರ್ಮ ಅವರು ಧ್ವನಿ ನೀಡಿದ್ದಾರೆ.

ಹೊಂಬಾಳೆ ಸಂಸ್ಥೆಯು ‘ಕಾಂತಾರ’, ‘ಬಘೀರ’, ‘ಯುವರತ್ನ’ ಸೇರಿ ಅನೇಕ ಚಿತ್ರಗಳನ್ನು ನಿರ್ಮಾಣ ಮಾಡುವ ಮೂಲಕ ಪ್ರಸಿದ್ಧಿ ಪಡೆದುಕೊಂಡಿದೆ.  ಇದೀಗ, ಭಕ್ತಿ ಕುರಿತಾದ ‘ಶಿವ ಶಂಭೋ ಸ್ವಯಂಭೋ’ ಹಾಡಿನ ಪ್ರೊಮೋ ಬಿಡುಗಡೆ ಮಾಡಿ ಪ್ರೇಕ್ಷಕರಲ್ಲಿ ನಿರೀಕ್ಷೆ ಹೆಚ್ಚಿಸಿದೆ.