ಪುಟಿನ್‌–ಝೆಲೆನ್‌ಸ್ಕಿ ಸಭೆಗೆ ಸಿದ್ಧತೆ: ಡೊನಾಲ್ಡ್ ಟ್ರಂಪ್

ವಾಷಿಂಗ್ಟನ್/ಮಾಸ್ಕೊ: ಉಕ್ರೇನ್‌ ವಿರುದ್ಧ ನಡೆಯುತ್ತಿರುವ ಯುದ್ಧವನ್ನು ನಿಲ್ಲಿಸುವುದಕ್ಕಾಗಿ ಅಧ್ಯಕ್ಷರಾದ ಉಕ್ರೇನ್‌ನ ವೊಲೊಡಿಮಿರ್ ಝೆಲೆನ್‌ಸ್ಕಿ ಮತ್ತು ರಷ್ಯಾದ ವ್ಲಾದಿಮಿರ್‌ ಪುಟಿನ್‌ ಅವರನ್ನು ಮುಖಾಮುಖಿ ಮಾಡಿ, ಸಭೆ ನಡೆಸುವ ಕುರಿತ ಸಿದ್ಧತೆಗಳಿಗೆ ಸೋಮವಾರ ಚಾಲನೆ ನೀಡಿರುವುದಾಗಿ ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್‌ ಹೇಳಿದ್ದಾರೆ.

ಒಂದೊಮ್ಮೆ ಉಭಯ ದೇಶಗಳ ಯುದ್ಧ ಕೊನೆಗೊಂಡ ನಂತರ, ಉಕ್ರೇನ್‌ ಮೇಲೆ ರಷ್ಯಾ ಮತ್ತೆ ದಾಳಿ ನಡೆಸದಿರುವುದನ್ನು ಖಾತ್ರಿಪಡಿಸಲು ಐರೋಪ್ಯ ರಾಷ್ಟ್ರಗಳು ರೂಪಿಸಿರುವ ಭದ್ರತಾ ಸೂತ್ರಕ್ಕೂ ಬೆಂಬಲಿಸುವುದಾಗಿ ಟ್ರಂಪ್‌ ಹೇಳಿದ್ದಾರೆ.

‘ಪುಟಿನ್‌ ಹಾಗೂ ಝೆಲೆನ್‌ಸ್ಕಿ ಅವರನ್ನು ಮುಖಾಮುಖಿಯಾಗಿಸುವ ಕುರಿತ ಪ್ರಯತ್ನಗಳು ಮುಂದುವರಿಯಲಿವೆ. ಇದರ ಭಾಗವಾಗಿ, ಝೆಲೆನ್‌ಸ್ಕಿ ಅವರೊಂದಿಗೆ ಸೋಮವಾರ ನಡೆದ ಸಭೆ ವೇಳೆ ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್‌ ಅವರೊಂದಿಗೆ ದೂರವಾಣಿ ಮೂಲಕ ಮಾತನಾಡಿರುವೆ. ಬ್ರಿಟನ್‌, ಫಿನ್ಲೆಂಡ್‌, ಫ್ರಾನ್ಸ್‌, ಜರ್ಮನಿ, ಇಟಲಿ ನಾಯಕರು ಹಾಗೂ ಐರೋಪ್ಯ ಆಯೋಗದ ಅಧ್ಯಕ್ಷರೊಂದಿಗೂ ಮಾತುಕತೆ ನಡೆಸಿರುವೆ’ ಎಂದು ಟ್ರಂಪ್‌ ಹೇಳಿದ್ದಾರೆ.

ಉಕ್ರೇನ್ ಮೇಲೆ ಮತ್ತೆ ದಾಳಿ ನಡೆಯದಂತೆ ಮಾಡಲು ರೂಪಿಸಿರುವ ಭದ್ರತಾ ಖಾತ್ರಿಗಳು ಹಾಗೂ ಯುದ್ಧ ಕೊನೆಗಾಣಿಸುವ ಸಂಬಂಧದ ಮಾತುಕತೆಗಳು ಇನ್ನೂ ಅಂತಿಮ ರೂಪ ಪಡೆದಿಲ್ಲ. ಆದರೆ, ಈ ಎಲ್ಲ ಪ್ರಯತ್ನಗಳು ಟ್ರಂಪ್‌, ಝೆಲೆನ್‌ಸ್ಕಿ ಮತ್ತು ಯುರೋಪಿನ ನಾಯಕರ ನಡುವೆ ಶ್ವೇತಭವನದಲ್ಲಿ ನಡೆದ ಸರಣಿ ಸಭೆಗಳ ಮುಂದುವರಿದ ಭಾಗಗಳೇ ಆಗಿವೆ ಎಂದು ಮೂಲಗಳು ಹೇಳಿವೆ.

‘ಭದ್ರತೆಯನ್ನು ಖಾತ್ರಿಪಡಿಸುವ ನಿಟ್ಟಿನಲ್ಲಿನ ಪ್ರಯತ್ನಗಳಿಗೆ ಕೈಜೋಡಿಸುವುದಾಗಿ ಅಮೆರಿಕ ಬದ್ಧತೆ ಪ್ರದರ್ಶಿಸಿದೆ. ಇದು, ಶ್ವೇತಭವನದಲ್ಲಿ ನಡೆದ ಸಭೆಗಳ ನಂತರ ಹೊರಹೊಮ್ಮಿರುವ ಮುಖ್ಯ ಫಲಿತಾಂಶ’ ಎಂದು ಫ್ರಾನ್ಸ್‌ ಅಧ್ಯಕ್ಷ ಇಮ್ಯಾನೆಯೆಲ್‌ ಮ್ಯಾಕ್ರನ್‌ ಹೇಳಿದ್ದಾರೆ.

‘ಮಾತುಕತೆ: ವ್ಯಾಪಕ ಸಿದ್ಧತೆ ಅಗತ್ಯ’

‘ಉಕ್ರೇನ್ ವಿರುದ್ಧದ ಯುದ್ಧವನ್ನು ಅಂತ್ಯಗೊಳಿಸುವ ಸಂಬಂಧ ನಡೆಯುವ ಮಾತುಕತೆಗೆ ವ್ಯಾಪಕ ಸಿದ್ಧತೆ ಅಗತ್ಯ’ ಎಂದು ರಷ್ಯಾ ಮಂಗಳವಾರ ಹೇಳಿದೆ.

ತ್ರಿಪಕ್ಷೀಯ ಮಾತುಕತೆ ಕುರಿತು ಅಮೆರಿಕ ಅಧ್ಯಕ್ಷ ಡೊನಾಲ್ಡ್‌ ಟ್ರಂಪ್‌ ಅವರ ಹೇಳಿಕೆಗೆ ಪ್ರತಿಕ್ರಿಯಿಸಿರುವ ರಷ್ಯಾ ವಿದೇಶಾಂಗ ಸಚಿವ ಸರ್ಗಿ ಲಾವ್ರೋವ್ ‘ದ್ವಿಪಕ್ಷೀಯ ಇಲ್ಲವೇ ತ್ರಿಪಕ್ಷೀಯ ಮಾತುಕತೆ ಮೂಲಕವಾದರೂ ಸರಿಯೇ ಉಕ್ರೇನ್‌ಗೆ ಸಂಬಂಧಿಸಿದ ಬಿಕ್ಕಟ್ಟನ್ನು ಬಗೆಹರಿಸಲು ರಷ್ಯಾ ಬದ್ಧ ಇದೆ. ಆದರೆ ಈ ಕುರಿತ ಸಭೆಯಲ್ಲಿ ಪಾಲ್ಗೊಳ್ಳುವ ವಿವಿಧ ರಾಷ್ಟ್ರಗಳ ನಾಯಕರಲ್ಲಿ ಸಂಪೂರ್ಣ ಸಿದ್ಧತೆ ಅಗತ್ಯ’ ಎಂದು ಹೇಳಿದ್ದಾರೆ.

‘ಈ ಮಾತನ್ನು ಅಧ್ಯಕ್ಷ ಪುಟಿನ್‌ ಅವರು ಹಲವು ಬಾರಿ ಪುನರುಚ್ಚರಿಸಿದ್ದಾರೆ. ಅಲ್ಲದೇ ಇಂತಹ ಸಭೆಗಳು ಕೇವಲ ಮಾಧ್ಯಮದಲ್ಲಿ ಪ್ರಚಾರದ ಉದ್ದೇಶ ಹೊಂದಿರಬಾರದು’ ಎಂದೂ ಅವರು ಪ್ರತಿಪಾದಿಸಿದ್ದಾರೆ.