IPL 2026 Auction: ಗ್ರೀನ್ ದುಬಾರಿ ಆಟಗಾರ; ಪ್ರಶಾಂತ್‌,ಕಾರ್ತಿಕ್‌ಗೆ ಜಾಕ್‌ಪಾಟ್

ಅಬುಧಾಬಿ: ಇಂಡಿಯನ್‌ ಪ್ರೀಮಿಯರ್ ಲೀಗ್ ಟ್ವೆಂಟಿ-20 ಕ್ರಿಕೆಟ್ ಟೂರ್ನಿಯ 2026ನೇ ಸಾಲಿನ ಮಿನಿ ಹರಾಜಿನಲ್ಲಿ ಆಸ್ಟ್ರೇಲಿಯಾ ಆಲ್‌ರೌಂಡ್ ಆಟಗಾರ ಕ್ಯಾಮರೂನ್ ಗ್ರೀನ್ ಬರೋಬ್ಬರಿ ₹25.20 ಕೋಟಿ ಮೊತ್ತಕ್ಕೆ ಕೋಲ್ಕತ್ತ ನೈಟ್ ರೈಡರ್ಸ್ ಫ್ರಾಂಚೈಸಿ ಪಾಲಾಗಿದ್ದಾರೆ.

ಆ ಮೂಲಕ ಐಪಿಎಲ್ ಇತಿಹಾಸದಲ್ಲೇ ಮೂರನೇ ಅತಿ ದುಬಾರಿ ಆಟಗಾರ ಎನಿಸಿರುವ ಗ್ರೀನ್, 2026ರ ಐಪಿಎಲ್ ಮಿನಿ ಹರಾಜಿನ ಅತಿ ದುಬಾರಿ ಆಟಗಾರ ಎಂದೆನಿಸಿದ್ದಾರೆ. ಅಷ್ಟೇ ಅಲ್ಲದೆ ಐಪಿಎಲ್‌ನ ಅತಿ ದುಬಾರಿ ವಿದೇಶಿ ಆಟಗಾರ ಎಂಬ ಖ್ಯಾತಿಗೂ ಪಾತ್ರರಾಗಿದ್ದಾರೆ. 

ತನ್ನ ಮೆಚ್ಚಿನ ಆಟಗಾರನ ಖರೀದಿಗಾಗಿ ಬಿಡ್‌ನಲ್ಲಿ ಹೆಚ್ಚು ದುಡ್ಡು ಸುರಿಯುವುದನ್ನು ರೂಢಿ ಮಾಡಿಕೊಂಡಿರುವ ಕೆಕೆಆರ್, ಶ್ರೀಲಂಕಾದ ವೇಗಿ ಮತೀಶ ಪತಿರಣ ಅವರನ್ನು ₹18 ಕೋಟಿ ನೀಡಿ ಕೆಕೆಆರ್ ಖರೀದಿಸಿದೆ. ಪತಿರಣ ಪ್ರಸಕ್ತ ಸಾಲಿನ ಐಪಿಎಲ್‌ನಲ್ಲಿ ಎರಡನೇ ದುಬಾರಿ ಆಟಗಾರ ಎನಿಸಿದ್ದಾರೆ.

2024ರಲ್ಲಿ ಆಸ್ಟ್ರೇಲಿಯಾದ ಮಿಚೆಲ್ ಸ್ಟಾರ್ಕ್‌ ಅವರನ್ನು ₹24.75 ಕೋಟಿಗೆ ಬಲೆ ಬೀಸಿದ್ದ ಕೆಕೆಆರ್‌, 2025ರಲ್ಲಿ ವೆಂಕಟೇಶ್ ಅಯ್ಯರ್‌ ಅವರನ್ನು ₹23.75 ಕೋಟಿಗೆ ಖರೀದಿಸಿತ್ತು. 

ಪ್ರಶಾಂತ್, ಕಾರ್ತಿಕ್‌ಗೆ ಜಾಕ್‌ಪಾಟ್‌…

ಪ್ರಶಾಂತ್ ವೀರ್ ಹಾಗೂ ಕಾರ್ತಿಕ್ ಶರ್ಮಾ ಅವರನ್ನು ತಲಾ ₹14.20 ಕೋಟಿಗೆ ಚೆನ್ನೈ ಸೂಪರ್‌ ಕಿಂಗ್ಸ್‌ ಕೊಂಡುಕೊಳ್ಳುವ ಮೂಲಕ ಐಪಿಎಲ್ ಇತಿಹಾಸದಲ್ಲಿ ಅತಿ ಹೆಚ್ಚು ಮೊತ್ತ ಪಡೆದ ಅನ್‌ಕ್ಯಾಪ್ಡ್ ಆಟಗಾರರು ಎಂಬ ಸಾಧನೆ ಮಾಡಿದ್ದಾರೆ. ಆ ಮೂಲಕ ಯುವ ಆಟಗಾರರು ಜಾಕ್‌ಪಾಟ್ ಪಡೆದಿದ್ದಾರೆ.  

ಉತ್ತರ ಪ್ರದೇಶ ಮೂಲದ 20 ವರ್ಷದ ಆಲ್‌ರೌಂಡ್‌ ಆಟಗಾರ ಪ್ರಶಾಂತ್ ವೀರ್ ಅವರು ₹30 ಲಕ್ಷ ಮೂಲ ಬೆಲೆ ಹೊಂದಿದ್ದರು. ಅಂತಿಮವಾಗಿ 5 ಬಾರಿಯ ಚಾಂಪಿಯನ್ ಚೆನ್ನೈ ಸೂ‍ಪರ್ ಕಿಂಗ್ಸ್ ಖರೀದಿಸುವಲ್ಲಿ ಯಶಸ್ವಿಯಾಯಿತು. 

ಮತ್ತೊಂದೆಡೆ ರಾಜಸ್ಥಾನ ಮೂಲದ 19 ವರ್ಷದ ವಿಕೆಟ್ ಕೀಪರ್‌ ಬ್ಯಾಟರ್ ಕಾರ್ತಿಕ್ ಶರ್ಮಾ ಅವರನ್ನು  ₹14.20 ಕೋಟಿ ನೀಡಿ ಸಿಎಸ್‌ಕೆ ಖರೀದಿಸಿತು. 

ಇನ್ನು ಜಮ್ಮು ಕಾಶ್ಮೀರ ಮೂಲದ 29 ವರ್ಷದ ಬೌಲಿಂಗ್ ಆಲ್‌ರೌಂಡರ್‌ ಆಕಿಬ್ ಡಾರ್ ಅವರು ₹8.4 ಕೋಟಿಗೆ ಡೆಲ್ಲಿ ಕ್ಯಾಪಿಟಲ್ಸ್ ಪಾಲಾಗಿದ್ದಾರೆ. 

ಹಾಗೆಯೇ ₹7.2ಕೋಟಿಗೆ ರವಿ ಬಿಷ್ಣೋಯಿ ಅವರನ್ನು ರಾಜಸ್ಥಾನ ರಾಯಲ್ಸ್ ಮತ್ತು ₹7ಕೋಟಿಗೆ ವೆಂಕಟೇಶ್ ಅಯ್ಯರ್ ಅವರನ್ನು ರಾಯಲ್ಸ್ ಚಾಲೆಂಜರ್ಸ್ ಬೆಂಗಳೂರು ತಂಡವು ಖರೀದಿಸಿದೆ. 

ಕಳೆದ ಸಾಲಿನಲ್ಲಿ ₹23.75 ಕೋಟಿಗೆ ವೆಂಕಟೇಶ್ ಅಯ್ಯರ್ ಅವರನ್ನು ಕೆಕೆಆರ್ ಖರೀದಿಸಿತ್ತು. 

ಐಪಿಎಲ್ ಮಿನಿ ಹರಾಜು 2026ರ ದುಬಾರಿ ಆಟಗಾರರ ಪಟ್ಟಿ:

• ಕ್ಯಾಮರೂನ್ ಗ್ರೀನ್‌: ₹25.20 ಕೋಟಿ (ಕೆಕೆಆರ್)

• 
  ಮತೀಶ ಪತಿರಣ: ₹18 ಕೋಟಿ (ಕೆಕೆಆರ್)

• 
  ಕಾರ್ತಿಕ್ ಶರ್ಮಾ: ₹14.20 ಕೋಟಿ (ಸಿಎಸ್‌ಕೆ)

• 
  ಪ್ರಶಾಂತ್ ವೀರ್‌: ₹14.20 ಕೋಟಿ (ಸಿಎಸ್‌ಕೆ)

• 
  ಲಿಯಾಮ್ ಲಿವಿಂಗ್‌ಸ್ಟೋನ್‌: ₹13 ಕೋಟಿ (ಎಸ್‌ಆರ್‌ಎಚ್‌)

• 
  ಮುಸ್ತಾಫಿಜುರ್ ರಹಮಾನ್‌: ₹9.2 ಕೋಟಿ (ಕೆಕೆಆರ್‌)

• 
  ಜೋಶ್ ಇಂಗ್ಲಿಸ್‌: ₹8.6 ಕೋಟಿ (ಎಲ್‌ಎಸ್‌ಜಿ)

• 
  ಆಕಿಬ್ ಡಾರ್‌: ₹8.4 ಕೋಟಿ (ಡೆಲ್ಲಿ ಕ್ಯಾಪಿಟಲ್ಸ್)

• 
  ರವಿ ಬಿಷ್ಣೋಯಿ: ₹7.2 ಕೋಟಿ (ರಾಜಸ್ಥಾನ ರಾಯಲ್ಸ್‌)

• 
  ವೆಂಕಟೇಶ್ ಅಯ್ಯರ್‌: ₹7 ಕೋಟಿ (ಆರ್‌ಸಿಬಿ)

• 
  ಜೇಸನ್ ಹೋಲ್ಡರ್‌: ₹7 ಕೋಟಿ (ಜಿಟಿ)