iPhone Air: ಇ-ಸಿಮ್ ಮಾತ್ರ ಬೆಂಬಲಿತ ಅತ್ಯಂತ ತೆಳುವಾದ ಐಫೋನ್ ಬಿಡುಗಡೆ

ಕ್ಯಾಲಿಫೋರ್ನಿಯಾ: ಟೆಕ್ ದೈತ್ಯ ಆ್ಯಪಲ್ ಸಂಸ್ಥೆಯು ಅತಿ ನೂತನ ಐಫೋನ್ 17 ಶ್ರೇಣಿಯ ಮೊಬೈಲ್ ಫೋನ್‌ಗಳನ್ನು ಮಾರುಕಟ್ಟೆಗೆ ಪರಿಚಯಿಸಿದೆ.

ಭಾರತದ ಮಾರುಕಟ್ಟೆಯಲ್ಲಿ ಐಫೋನ್ 17 ಶ್ರೇಣಿಯ ಮೊಬೈಲ್‌‍ಗಳ ಬೆಲೆ ₹82,900ರಿಂದ ಆರಂಭವಾಗಲಿದ್ದು, ಗರಿಷ್ಠ ₹2,29,900ರವರೆಗೆ ನಿಗದಿಯಾಗಿದೆ.

ಈ ಪೈಕಿ ಸಂಸ್ಥೆಯು ಅತ್ಯಂತ ತೆಳುವಾದ 'ಐಫೋನ್ ಏರ್' ಶ್ರೇಣಿಯನ್ನು ಪರಿಚಯಿಸಿದ್ದು, ಮೊಬೈಲ್ ಮಾರುಕಟ್ಟೆಯಲ್ಲಿ 'ಗೇಮ್ ಚೇಂಜರ್' ಆಗಿರಲಿದೆ ಎಂದು ತಜ್ಞರು ವಿಶ್ಲೇಷಣೆ ಮಾಡಿದ್ದಾರೆ.

'ಇ-ಸಿಮ್' ಮಾತ್ರ ಬೆಂಬಲಿತ ಮೊಬೈಲ್ ಇದಾಗಿದ್ದು, ಕೇವಲ 5.6 ಮಿ.ಮೀ. ದಪ್ಪ ಇದೆ. ಸಂಸ್ಥೆಯ ಇತಿಹಾಸದಲ್ಲೇ ಇದುವರೆಗೆ ನಿರ್ಮಿಸಿದ ಐಫೋನ್‌ಗಳ ಪೈಕಿ ಅತ್ಯಂತ ತೆಳ್ಳಗಿನ ಐಫೋನ್ ಇದಾಗಿದೆ.

ಆ್ಯಪಲ್‌ನ ಅತಿ ನೂತನ ಎ19 ಪ್ರೊ ಪ್ರೊಸೆಸರ್ ಚಿಪ್ ಸಹ ಹೊಂದಿರಲಿದೆ. ಹಾಗೆಯೇ ಹಿಂಬದಿಯಲ್ಲಿ ಒಂದು ಕ್ಯಾಮೆರಾ ಇರಲಿದೆ.

ಇನ್ನೊಂದು ಗಮನಾರ್ಹ ಅಂಶವೆಂದರೆ ಹೊಸ ಐಫೋನ್ ಶ್ರೇಣಿಗಳಲ್ಲಿ 128ಜಿಬಿ ಸ್ಟೋರೇಜ್ ಮಾದರಿ ಲಭ್ಯವಿರುವುದಿಲ್ಲ.

256ಜಿಬಿ ಹಾಗೂ 1ಟಿಬಿ ಸ್ಟೋರೇಜ್ ಆಯ್ಕೆಗಳಲ್ಲಿ ಐಫೋನ್ ಏರ್ ಶ್ರೇಣಿಯ ಸ್ಮಾರ್ಟ್‌ಫೋನ್ ಲಭ್ಯವಾಗಲಿದೆ. ಇದರ ಆರಂಭಿಕೆ ಬೆಲೆ ₹1,19,900 ಆಗಿದೆ.

ಐಫೋನ್ 17 ಪ್ರೊ, 256ಜಿಬಿ, 512ಜಿಬಿ ಮತ್ತು 1ಟಿಬಿ ಸ್ಟೋರೇಜ್‌ಗಳಲ್ಲಿ ಲಭ್ಯವಿರಲಿದೆ. ಇನ್ನು ಐಫೋನ್ 17 ಪ್ರೊ ಮ್ಯಾಕ್ಸ್ 256ಜಿಬಿ, 512ಜಿಬಿ, 1ಟಿಬಿ ಜೊತೆಗೆ 2ಟಿಬಿ ಸ್ಟೋರೆೇಜ್ ಆಯ್ಕೆಯಲ್ಲೂ ದೊರಕಲಿದೆ.

'ಹೊಸ ಐಫೋನ್‌ಗಳು ಅತ್ಯಾಧುನಿಕ ವಿನ್ಯಾಸ ಹಾಗೂ ಗಮನಾರ್ಹ ಫೀಚರ್‌ಗಳನ್ನು ಹೊಂದಿದೆ' ಎಂದು ಆ್ಯಪಲ್ ಸಿಇಒ ಟಿಮ್ ಕುಕ್ ತಿಳಿಸಿದ್ದಾರೆ.

ಐಫೋನ್ 17 ಶ್ರೇಣಿಯ ಸ್ಮಾರ್ಟ್‌ಫೋನ್‌ಗಳು ಸೆಪ್ಟೆಂಬರ್ 19ರಂದು ಭಾರತದ ಮಾರುಕಟ್ಟೆಗೆ ಅಪ್ಪಳಿಸಲಿದೆ.