2025ರ ಮೆಲುಕು | ನನ್ನ ಸಾಮರ್ಥ್ಯ ನನಗೇ ಸಾಬೀತಾದ ವರ್ಷ: ತನಿಷಾ ಕುಪ್ಪಂಡ ಸಂದರ್ಶನ

ಹಲವು ರೀತಿಯ ಅನುಭವಗಳನ್ನು ನೀಡಿದ ವರ್ಷ 2025. ಹಲವರ ಮನಸ್ಥಿತಿಗಳು ಅರ್ಥವಾದವು. ನಮ್ಮವರು ಎಂದು ನಾವು ಅಂದುಕೊಂಡವರು ಯಾರೂ ನಮ್ಮವರಾಗಿರಲ್ಲ ಎನ್ನುವುದು ತಿಳಿಯಿತು. ಅಂತಹ ವಿಚಿತ್ರ ಅನುಭವಗಳನ್ನು ಈ ವರ್ಷ ಕೊಟ್ಟಿತು. ಸಿನಿಮಾ ವಿಷಯಕ್ಕೆ ಬರುವುದಾದರೆ ತುಂಬಾ ಒಳ್ಳೆಯದಾಯಿತು. ನಿರ್ಮಾಪಕಿಯಾಗಿ ಗುರುತಿಸಿಕೊಂಡೆ ಎಂಬ ಖುಷಿ ಇದೆ. 'ಕೋಣ' ಸಿನಿಮಾ ಬಿಡುಗಡೆಯಾಗಿದೆ. ಚಿತ್ರಮಂದಿರದಲ್ಲಿ ಗೆದ್ದು, ಒಟಿಟಿಗೂ ಬಂದಿದೆ. ವೈಯಕ್ತಿಕವಾಗಿ ಸಿನಿಮಾ ವಲಯದಲ್ಲಿ ಅನುಭವಗಳೊಂದಿಗೆ ಎತ್ತರಕ್ಕೆ ಬೆಳೆದೆ.

ನನಗೆ ನನ್ನ ಸಾಮರ್ಥ್ಯ ಬಗ್ಗೆ ಗೊತ್ತಿತ್ತು. ಆದರೆ ಅದರ ಫಲಿತಾಂಶ ಗೊತ್ತಿರಲಿಲ್ಲ. 2025ರಲ್ಲಿ ನನ್ನ ಸಾಮರ್ಥ್ಯದ ಫಲಿತಾಂಶ ನನಗೇ ಕಾಣಿಸಿತು. ಅದು ಈ ವರ್ಷದ ಅತ್ಯಂತ ಸಿಹಿನೆನಪು ನನಗೆ. ನನ್ನಿಂದ ಇದು ಸಾಧ್ಯನಾ ಎಂದು ಅನುಮಾನ ಪಡುತ್ತಿದ್ದದ್ದನ್ನು ಈ ವರ್ಷ ಸಾಧಿಸಿದೆ ಎನ್ನುವ ಸಂಭ್ರಮ ಇದೆ.

ಬದುಕು ಸಾಧ್ಯವಾದಷ್ಟು ಉತ್ತಮವಾಗಿರುತ್ತದೆ. ಸಿಹಿ- ಕಹಿ ಎಲ್ಲವೂ ಇರುತ್ತದೆ. ಈ ವರ್ಷ ಕೆಲವರ ನಿಜ ಬಣ್ಣ ಬಯಲಾಯಿತು. ಕೆಲವರ ಬೇಳೆ ಬೇಯಲ್ಲ ಎಂದಾಕ್ಷಣ ಎಷ್ಟು ನಾಜೂಕಿನಿಂದ ಬದಲಾಗುತ್ತಾರೆ ಎನ್ನುವುದು ಸಾಕ್ಷಿಸಹಿತ ಬಯಲಾಯಿತು. ಅದರ ಬಗ್ಗೆ ಮಾತುಕತೆಯಾಗುವಾಗ ವಿಷಯ ಪಲ್ಲಟ ಮಾಡುತ್ತ ಒಳ್ಳೆಯವರಾಗಿರಲು ಪ್ರಯತ್ನಪಡುತ್ತಾರೆ. ಅಂಥವರನ್ನು ದೂರ ಇಡುವ ಪ್ರಯತ್ನದಲ್ಲಿ ಈ ಯಶಸ್ವಿಯಾದೆ. ಒಂದು ಕಾಲದಲ್ಲಿ ನನಗೆ ಹಿತೈಷಿಗಳಂತೆ ಇದ್ದವರು ಈಗ ಹೀಗಾಗಿರುವುದು ಒಂದು ರೀತಿಯಲ್ಲಿ ಕಹಿ ಸಂಗತಿಯೇ ಹೌದು.

ತೂಕ ಕಡಿಮೆ ಮಾಡಬೇಕು ಅಂತ ಪ್ರತಿ ವರ್ಷ ಅಂದುಕೊಳ್ಳುತ್ತೇನೆ. ವರ್ಷ ಮುಗಿಯುವಷ್ಟರಲ್ಲಿ, ಅಯ್ಯೋ‌ ಇದಕ್ಕಿಂತ ಕಳೆದ ವರ್ಷ ಎಷ್ಟೋ‌ ಚೆನ್ನಾಗಿದ್ದೆ ಅಂತ ಅನಿಸತೊಡಗುತ್ತದೆ(ನಗು?). ಅದು ಬಿಟ್ಟರೆ ಬೇರೆ ರೀತಿಯ ಬದಲಾವಣೆಗಳು ಸಹಜವಾಗಿ ಇದ್ದೇ ಇರುತ್ತವೆ.

ನಿರ್ಮಾಪಕಿಯಾಗಿ, ಉದ್ಯಮಿಯಾಗಿ ಕುಪ್ಪಂಡ ಪ್ರೊಡಕ್ಷನ್ಸ್ ನಿಂದ ಗುರುತಿಸಿಕೊಂಡಿದ್ದೇನೆ. ಆದರೆ ಈ ಬಾರಿ ಇದನ್ನೆಲ್ಲ ಮೀರಿದ ಬಹುದೊಡ್ಡ ಯೋಜನೆಯೊಂದಕ್ಕೆ ಕೈ ಹಾಕಿದ್ದೇವೆ. ಸಿನಿಮಾ ಅಲ್ಲ, ಆದರೆ ಸಿನಿಮಾ ವಲಯದಲ್ಲಿಯೇ ಬೇಕಾದ ವಿಷಯ. ಶೋಕಿಗಾಗಿ, ಮಾತಿಗಾಗಿ ಇದನ್ನು ಹೇಳುತ್ತಿಲ್ಲ. ಆ ಯೋಜನೆ ಏನು ಎನ್ನುವುದನ್ನು ಈಗ ಹೇಳುವುದಕ್ಕಿಂತ ಕೆಲಸ ಸಾಕಾರಗೊಂಡ ಮೇಲೆ ಹೇಳುವೆ. ಇನ್ನೊಂದು ಸಿನಿಮಾ ಕೂಡ ಸಿದ್ಧವಾಗಲಿದೆ.

ಕಷ್ಟದ ಸಂದರ್ಭಗಳಲ್ಲಿ ನೋವುಗಳನ್ನು ಇತರರ ಮುಂದೆ ತೋಡಿಕೊಳ್ಳದೆ, ನೋವಿದ್ದರೂ ಇಲ್ಲದಂತೆ ಕಾಣಿಸಿಕೊಳ್ಳುವುದು ಒಳ್ಳೆಯದು. ನೀವು ನೋವು ತೋಡಿಕೊಂಡರೆ ಅದನ್ನು ಆಡಿಕೊಳ್ಳುವವರೇ ಇದ್ದಾರೆಯೇ ಹೊರತು ವಾಸ್ತವದಲ್ಲಿ ನಿಮ್ಮ ಸಂಕಟ ಯಾರಿಗೂ ಬೇಕಿರುವುದಿಲ್ಲ. ಪಕ್ವವಾಗಿ, ಪ್ರಬುದ್ಧರಾಗಿ ನಿಮ್ಮಷ್ಟಕ್ಕೇ ಬೆಳೆಯಿರಿ. ಯಾವ ವಿಷಯಕ್ಕೂ ತಲೆ ಕೆಡಿಸಿಕೊಳ್ಳಬೇಡಿ. ಇನ್ನು, ಫ್ಯಾಶನ್ ಕಡೆ ಗಮನ ಕೊಡಿ. ಒಳ್ಳೊಳ್ಳೆಯ, ನಿಮ್ಮಿಷ್ಟದ ಬಟ್ಟೆಗಳನ್ನು ತೊಟ್ಟು ಸಂಭ್ರಮಿಸಿ. ಯಾಕೆಂದರೆ ತೊಟ್ಟ ಬಟ್ಟೆಯ ಆಧಾರದಲ್ಲಿ ವ್ಯಕ್ತಿತ್ವವನ್ನು ಅಳೆಯುವವರಿದ್ದಾರೆ. ಅದನ್ನು ಮೀರಬೇಕು. ಧೈರ್ಯವಾಗಿ ನಿಮ್ಮಿಷ್ಟದಂತೆ ಬದುಕಿ. ಅಷ್ಟೇ.